財經評論：
雞年先催旺正財位
■雞年的正財位轉至東位。 資料圖片
作為一個喜歡採取主動的記者，趁雞年將至，雖然未向上司諮詢，但都問咗私家風水大師拎咗雞年家居風水佈陣圖，無非想為讀者多做事。
旺位年年換，財神爺個位都易了位，由猴年的西南位，轉成雞年的東位，呢個就係關乎人人飯碗嘅正財位。催旺正財位
，有兩種睇法，一派話本住山管人丁，水管財的概念，建議財位放杯水，水為財。追隨呢派者，有啲認為唔夠，話要養缸魚，水要流動先生財；另一派認為，八白屬土，五行相生，火生土，佈置屬火的物品，例如點燈，或者佈置大紅大紫。
姑勿論跟邊派，呢個財位並唔係橫財，係某種命格，啫係「火貪格」、「鈴貪格」嘅人先容易有。今年息口持續向上，政治氣氛緊張，咁嘅環境下公司唔易做。催旺正財位，保住個飯碗，就算個飯碗太細，食得個心唔舒服，食住先啦！
無論仔女幫手機公司打天下，還是留係外國讀書，個個阿太都關心每年嘅文昌位，有啲總要有所作為，搞搞新意思先至心安理得。但若然要搞，就唔好亂搞東北，事關文昌位就係東北位，穩陣起見都係聽從大眾智慧，擺放文昌塔、四支富貴竹。到時仔女坐係文昌位，就算要完成3,400字的論文，唔使暴瘦34磅都可以克服。
每年煞星二黑五黃，今年五黃來自南方，五黃屬土，金屬物洩土氣，二黑位處西北位，擺放銅錢制壓衰氣。尤其主人房在雙煞方位，建議寧可信其有。
記者：陳家雄
財經評論 舊文
來源 source: http://hk.apple.nextmedia.com