智取大市：引移民撐經濟？
■筆者指二百年前美國聚集了千千萬萬個肯博命冇浸死嘅阿Jack，才能夠有今日嘅成就。 互聯網
股神畢菲特喺股東信件當中，用幾頁篇幅去解釋移民所作嘅貢獻。美國宣佈獨立只係二百幾年，能夠發展到今日嘅成就，移民的確係成功最大元素。大家有冇睇過《鐵達尼號》？敢冒險嘅阿
Jack，就靠一場賭博而賺取登上美國大船機會。當年美國聚集咗千千萬萬個肯博命、勇於改變現狀而冇浸死嘅阿Jack，想唔發達至奇。
故仔熟口熟面？香港由小漁港變國際金融中心嘅故事，有異曲同工之妙。幾十年前一批敢冒險嘅人，由大陸遊水落嚟博殺，70年代香港就係靠佢哋起機。有越多移民湧入，理論上提供更多生產力，對經濟係咪十分著數？要視乎新移民生產力會否「跑贏」原有居民，更重要係睇嚇新移民有冇生產力嘅增長空間。
近年香港出現另一股內地人南下現象，卻未有令香港經濟高速增長，箇中原因不難理解。南下移民中有富豪、有專才、有低下階層，但無論富或貧，主要受香港制度等等所吸引，嚟嘆多過想博，但始終未有為港大幅提供新產能及實質投資，撻唔著增長引擎，香港仍只能原地踏步。
香港一直專注賺大陸錢、向大陸提供服務，而非引入有生產力然後去服務全世界，定位就是過份短視。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com