財金冒險號：
富豪仲移民香港？
■肖建華的聲明不禁令人想起《整蠱專家》中，周星馳食咗謊言豆沙包嘅一幕。 互聯網
內地富豪肖建華離奇在本港失蹤，據聞被黑幫挾上大陸，然後發聲明（姑勿論係自願定被迫），內容極有黑色幽默感：「中國政府是文明法治的政府」，令人諗起電影《整蠱專家》中，食咗謊言
豆沙包嘅周星馳話「李鵬係我哋最偉大嘅領袖」。
「本人為加拿大公民」更可圈可點，足以震驚14億人：原來走資落嚟香港買樓買股，甚至擁有西方文明國家護照，根本唔安全。上年10月底，胡潤與諮詢公司發表報告，指中國最有錢嘅人當中，超過六成計劃喺未來三年投資海外物業，而美國係移民及投資嘅熱門地方。
呢一點毫不意外，中國人「口裏說不，身體卻很誠實」，平日鬧美帝，但發夢都想做美國人。報告嘅另一點更有趣：只有1.1%的中國富豪想移民香港並置業，可見中國富豪心知肚明，移民香港難保證身家性命安全，尤其係超級富豪，邊個自問發跡過程全無犯法貪腐、唔怕被強力部門「跨境執法」？
不過，兩年前巴克萊銀行訪問過2,000個中國富豪，有近半話會離開中國，而竟然有三成人首選移民香港。點解胡潤同巴克萊嘅調查結果差咁遠，小生唔知，但我肯定如果今日再問呢班有錢佬，眼見香港經過三權合作、人大改基本法、李波、肖建華事件，有得揀嘅話，移民一定唔揀香港。如此轉變，或者會對香港嘅樓市有微妙影響。
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com