操盤手劄記：
幾千利是夠買藍籌
■想投資一手入場費唔使一萬元嘅藍籌，不妨留意中海油。 資料圖片
港股雞年首個交易日，未能紅盤高開，一來市場觀望美國聯儲局議息結果；二來美國總統特朗普及其經濟顧問抨擊中國、日本、德國三大貿易夥伴操縱貨幣貶值，市場擔心係貿易戰或貨幣戰前哨。恒指昨收23318
，跌42點或0.2%。
過年逗利是，係小孩子一大收入來源，有幾千元已經唔少，通常父母會幫子女儲起來。不過，擺喺銀行冇乜利息，不如用來投資。若果視之為教育基金，投資年期動輒十年以上，揀藍籌股比較穩健。
揸住幾千元，可以買藍籌？現時50隻藍籌中，有12隻幾千元已有交易，包括新世界（017）、東亞（023）、旺旺（151）、利豐（494）、中海油（883）、建行（939）、神華（1088）、友邦（1299）、工行（1398）、百麗（1880）、交行（3328）及中行（3988）。
舊年一手入場費唔使一萬元嘅藍籌「上車股」有15隻，但當中嘅中石化（386）、中石油（857）、中銀（2388），一年來升幅可觀，一手已需過萬元。中銀更加係猴年藍籌升幅之冠，勁升69.8%，跑贏恒指嘅21.1%升幅！雞年「藍籌之升」又會唔會來自「上車股」呢？
現時四大內銀入場費只需三千幾至五千幾元，但我對內銀有戒心，尤其近月信貸增長過快，人行勢必嚴控。入場費最高嘅「上車股」係中海油，一手盛惠9,750元。油股升跌關乎油價，油價除了受產量、庫存量影響，亦要睇各國石油企業開採成本。據Rystad Energy統計，英國油企開採成本較高，大約每桶52美元；巴西、加拿大、美國、墨西哥、俄羅斯、委內瑞拉，分別係48、41、36、29、17及13美元；中東國家大約10美元。至於中國，則為40至50美元。
觀乎三桶油開採成本，中海油為41美元，比內地同業平均45美元為低，競爭力最強。招商證券早前發表報告，指油價變動1美元，中海油淨利潤就會變動19億元人民幣；假設今年平均油價每桶55美元，中海油將錄得198億元人民幣經常性淨利潤，不妨留意。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com