中環在線：
葉家寶再降呢變無奈辭職？
■協盛協豐昨宣佈葉家寶辭任執董及附屬豊藝行政總裁職務。 資料圖片
亞視前執董、協盛協豐（707）執董葉家寶近年運氣認真麻麻。葉家寶前年去咗協盛協豐做行政總裁，主力處理亞視重組問題，但舊年5月就被退任行政總裁，「降呢」做執董兼附屬公司豊藝國際文化行
政總裁，噚日協盛協豐進一步宣佈，葉家寶「擬投入更多時間於其他個人事業」，已辭任執董及附屬豊藝行政總裁職務，即日生效。
六嬸愛將執二攤
華華就收到風，葉家寶其實係厭倦權鬥而離開，而唔係擬投入更多時間於其他個人事業。據知情者所講，舊年5月葉家寶已經因為公司權鬥而被迫「降呢」做公司執董。今次更加「難為了家寶」，聞說公司有人做錯事，葉家寶成為代罪羔羊。華華曾經打電話想去問葉家寶今次嘅來龍去脈，可惜冇人聽電話。
講番頂替葉家寶嘅仁兄，協盛協豐搵咗前TVB（電視廣播、511）前助理總經理、六嬸愛將區偉林去頂替葉家寶個位。據了解，區偉林早年曾經喺邵氏工作，之後離開無綫，喺加拿大溫哥華嘅華語電視台擔任財務職位。
2009年佢得到六嬸方逸華垂青，回流返港，喺無綫出任成本管理總監，2011年再擢升為助理總經理，但就喺舊年中「大清洗」時，與傳訊部宣傳科副總監曾醒明一齊「被退休」。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com