有文件有概念
2017年02月07日
雞年第一個升市終於出現，而且彈番二百幾點，金融股成為火車頭，有啲令人意外嘅係，除左國際銀行股得之外，中資金融股表現仲標青，特別係內險股，升幅跑贏左保險股。
內險股急升，主要係內地有媒體引述消息人士，話近日若干省份正在委託全國社保基金理事會，對階
段性的結餘養老保險金進行運作，隨著春節假期結束，預期養老金已準備到位或將正式入市。
內險股借住險資入市炒上，同內地股市表現亦有關。A股長假後復市首日低收，無乜火氣，中資股都無左方向，昨日A股好番，兩市三大股指均上升，市場成交量增加至3000億人民幣過放。上證指數全日收報3156點，升16點，深證成指收報10078點，升73點，創業板指收報1900點，升23點。個股方面，有接近八成半的個股上漲，漲停個股則達62隻，勢頭好似唔錯。
跟A股炒吓國策
內地炒股主要跟國策，內地雖然降低左增長目標，但結構改革就拋出好多概念，好似混改、去產能，以至新產業等。如果呢啲概念落實，會利好上市公司經營環境，有利股市，同樣對內險股投資有改善。至於養老金入市呢樣嘢，法規準備好只係基本條件，最重要係資金真係願意流入，如果個市有嘢好炒，就算無養老金，一樣可以照升。
好似個市昨日炒吓「一號文件」影響的改革板塊，涉及股份就有農業、煤炭等。股市之外，期貨市場受嘅影響仲明顯，澱粉、玉米等農業商品期貨均上揚，貴金屬板塊商品全線上漲。其他商品期貨，滬金、滬銀期貨收市分別上漲1.11%和1.1%。
下跌商品中，焦炭期貨以5%的跌幅位居商品主力合約跌幅榜首位，焦煤下跌3%。中央早前強調煤炭行業要去產能，做計會令整個行業嘅利潤大幅改善，龍頭嘅股份好似神華(1088) 、中煤能源(1898) 過去已經冉冉上升，反映經營環境有改善。中環茶友笑言，O依家特朗普搞美國優先，法國右翼總統候選人又搞法國優先，內地都可以搞番個「炒A股優先」的口號。
內地O依家對人民幣落晒閘，資金無乜出路，咁樣有利A股炒番高啲，如果A股有景，咁可能又會吸引番啲資金留低。
內地A股有無茶友講得咁理想唔知。不過，內地通常喺春節後多政策出台，O依家中央要講優化經濟結構，股市消息會多，投資者大可順勢而炒。
渣打跌得甘彈得勁
內險股成為突圍奇兵，國壽(2628) 大漲7.5%，報23元，成表現最佳藍籌；平保(2318) 走高4.6%，報41.05元；中國太平(966) 升5.3%，報18.02元；太保(2601) 升5.7%，報28.8元。喺佢地帶動下，港股雖然開市初段一度湧現獲利盤，大市升幅曾受壓，升幅收窄至20點，中段重展升勢，午後升幅進一步擴大，以全日高位數市，收報23348，升219點；國企指數收報9840點，漲157點，成交金額694億元。
有望受惠於美國擬放寬銀行業監管的滙控(005) 升0.84%，報66.35元，另一隻跨國銀行股渣打(2888) 仲靚仔，收報78.9，升1.85元。渣打去年由於市場擔心佢放貨畀商品關連嘅客戶多，喺商品跌浪中會受損，股價一度大插，前年供過股後，去年仲要暫停派息，股價最低插穿43元水平，好彩跟住全球商品市場包括石油、鋼鐵回升，好多客戶財政穩定番，加上集團出售部份業務增加資本，令到股價生猛番，正因為跌得多，彈得也勁。
陸羽仁
金融High Tea 舊文
來源 source: http://hdfin.stheadline.com