笑到最後：
I.T短線突破的啟示
■I.T過去幾次短線突破。 資料圖片
兩星期前，本欄寫「大時代之焗追」，因港股成交急增，明知升得過多都一樣要追貨，道理等同政治上要策略性投票，一陣大時代再臨而手上冇貨，恐怕會「零持處死」，不如買到一個可以安心瞓覺嘅水平，即使中伏都唔會太傷。
大市近一周
由高位回落，果然中咗伏，現時只係得個等字，特別係遇上兩會開幕，過去幾年市況顯示兩會期間跌多升少，或因兩會前預期太多，到開會後無明顯利好消息就先沽一輪，加埋最新聯儲局主席耶倫暗示3月加息「好可能係合適」，議息會喺今個月14日至15日開，呢輪可能要唞一唞。
高明年初喺本報〈周日投資導航〉推介I.T（999），所以較留意呢隻股走勢，無意間發現隻股過去幾次短線突破，如去年10月25日高見3.15元，及12月7日見3.48元，咁啱得咁橋，恒指之後都回落過千點，兩者可能無關係，亦可能係咁啱資金炒到最後先分少少出嚟輪到I.T，所以喺港股升市尾聲I.T就上。最近嘅2月28日，I.T又炒返上3.37元近期高位，然後呢幾日個市又稍為回一回。
炒股票令人免於體力勞動，代價就係心理煎熬，如果相信之前千億成交唔會咁快散場，呢排撲暈自己，唔好望個市，過一排海闊天空。
另外，中原城市領先指數破頂見148.22點，舊年高明寫過篇《辣招推高樓價一成》，當時指數係143.49點，對比當時升3.3%，同舊年11月加辣後坊間普遍預期樓市會跌唔同。樓市長升元凶一，低息；二，辣招收緊二手供應，加劇升幅；三，發展商單位越起越細賺盡。美國息口政策，香港無法改變，但已開始加息周期；至於辣招，政府思維樓價唔跌都唔會撤。特首候選人對冷卻樓市答案就係增加供應，增加啲細樓冇乜用，不如喺賣地條款內設最低呎數，進行逆向限呎，當大單位供應多到跌價，劏房樓無條件再升；就算政策出錯，將來出現樓災，都叫令香港人生活空間大咗，好過勉強限呎上車，但單位細過停車位。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com