發展商肥到着唔到襪
2017年03月01日
二月份最後一個交易日，港股再跌，同美股連升十二日相比，港股真係無氣無力。大市咁樣表現有兩個原因，首先係中港經濟運行嘅周期同美國唔同，美國而家完成左谷底回升起動嘅階段，開始進入加速狀態，中港兩地則仲係L形底部，基本上尋緊底，仲未係好明確可以回升
，比較短線嘅係，公佈出嚟大公司業績，金融股嘅滙控(005) 、渣打(2888) 同埋港交所(388) 都缺乏驚喜，影響左市場嘅氣氛。
港交所公佈業績後，大家睇真啲，單計去年第四季，港交所收入及純利已是連續第二年按季下跌，亦是全年賺錢最弱的一季。綜合投行報告，給予港交所目標價為185至190元，較昨日收市價計，有最多5%下跌空間。雖然管理層正盡最大努力促成全球最大IPO、沙特阿拉伯國營石油公司沙特阿美(Saudi Aramco)來港上市，但沙地同美國佬的關係係大佬同細佬，點睇肥水都易去別人田，港交所股價繼續下插1.4%，收報192.7元。
新地績靚前景多挑戰
銀行股後輪到地產股開始派成績表，新鴻基地產(016) 公佈截至2016年底止六個月業績，純利206億元，按年增長40%。每股盈利7.14元；派中期息1.1元。撇除投資物業公平值變動的影響後，集團基礎盈利146億元，按年增長57%。無論左睇右睇，都係肥到著唔到襪。市場而家最關心唔係發展商呢兩年賺唔到錢，而係樓市會唔會爆，又或者樓價升得太多引起社會反彈。而家內房商殺入香港，令到地價急升，對發展商嚟講好處係佢地手頭儲備價值急升，身家即時厚左好多，壞處係補充土地儲備成本急漲，經營風險大增。好似上個星期鴨脷洲塊地王，聽聞新地出價都好勇，結果都係鬥唔過啲中資。昨日截標的港鐵黃竹坑站第1期項目公佈結果，又由路勁基建夥平安不動產(即平保旗下公司)奪得，力壓其餘13間入標財團，項目可建樓面為57.6萬餘方呎。咁搞法香港發展商一係同內地資金鬥癲，一係就企係度睇人搶灘，所以呢門生意再唔係本地公司可以獨食嘅金礦，長遠嚟講風險會增加，回報就下降。新地股價係業績唔錯下，跟隨大市跌左1%，報收113.5元。
三月市要睇兩會主題
本地藍籌業績暫時無驚喜，美股連升下恒生指數係月尾錄得「四連跌」，累積下跌461點，恒指昨天亦以全日最低位收市，收市報23740，成交亦稍為回落至731億元。以整個2月份計算，恒指累積上升379點，相當於1.6%升幅。由於1月份亦是升市，因此港股自踏入2017年以來，已經連升兩個月。
三月份個市開局，今個月主題之一係兩會，市場憧憬內地在「兩會」之後，將會大舉發展建基以刺激經濟，令到建材股先來第一輪炒作。中材股份(1893) 升5%，報2.67元；台泥國際(1136) 升6.5%，報收2.13元，並創52周新高；中國建材(3323) 漲4%，報收5.66元。唔排除其他主題會陸續上菜。
除左大股外，個別冷股都有異動。大昌微線集團(567) 今早以0.49元開出後，愈升愈有，新報0.62元，升24%。大昌微線集團停牌十九個月後，於今年1月26日復牌，股價持續向下，呢類冷門股貨源稀少，加上佢市值跌到不足3億元，基本上係任人任人舞上舞落。
陸羽仁
金融High Tea 舊文
來源 source: http://hdfin.stheadline.com