樓價破頂唔關奶媽事
2017年03月29日
美國新政府廢除奧巴馬醫改受挫，美股繼續借勢調整，美元匯價就快跌番去舊年特朗普上台時的原型，美元指數連99都一度跌穿。今次事件令市場對總統特朗普嘅信心受左打擊，令憧憬新政帶來經濟刺激嘅熱情冷卻，股市因此稍為降溫。雖然係咁，美股而家調整幅度仲係
好少，唔算好大件事，只係如果想要再向高位挺進，就要另找新消息嘞。
特朗普行事粗豪，傳統上總統就算出現政黨輪替，政策要改弦易轍，都係陰陰手做，「笑騎騎、放毒蛇」，好少好似佢咁擺明車馬唔妥上一任。不過，奧巴馬都不是省油的燈，佢係任內成功推動醫改，特朗普想拆佢招牌，就遇上好大政治阻力，今次仲係畀自己友、共和黨的右派玩死。
做特首唔會想樓價失控
中環茶友笑言，福利主義從來易放難收，奧巴馬放左隻鬼出嚟，你想捉番入去都幾難，所以都係香港建制派精啲，佢地本來唔鍾意林鄭月娥做特首，驚佢搞民粹主義派福利，初時亦有人寧願支持懶懶地嘅鬍鬚曾，但一見阿爺力挺林鄭，勢色唔對就紛紛跳船，咁好過選票錯投，無晒影響力。而家佢地投左票畀奶媽，以後可以同佢講我有支持你喎，你派錢還派錢，最緊要唔好太過份，一於鍊住荷包。
林鄭得票777，其中起碼有300票來自商界，點講佢都唔可以當呢班人無到。林鄭當選後，有啲地產代理出嚟吹，話佢會令樓市健康發展，所以樓價會好，於是唔止一手樓加價加推，連二手市場都紛紛破頂。對於呢個講法，茶友就唔係幾同意，佢話無錯商界投左好多票畀林鄭，係對佢猛派錢同走民粹主義可以起到啲制約作用，但若然話林鄭會令樓價升，咁就真係睇唔到。
首先，林鄭自己好明顯唔係一個樓市信徒，睇佢咁多年都無乜點係香港買樓，唔係一個鍾意磚頭嘅人； 二係樓價大升，肯定增加左管治嘅困難，任何想連任嘅特首，都唔會希望見到呢個現象，可以估計新等首上任後，搵地造地工作會繼續大力做，而且佢比振英熟悉政府機器運作，唔排除佢搵地效率會高啲添，所以林鄭當選對樓價利好肯定唔夠鬍鬚當選大，話因為佢所以一、二手樓價錢升，只係代理用嚟吹水唱好嘅口術而已。最驚升得太勁，未到奶媽上任，CY落任前已再出招打擊樓市。
賭股再開番一鋪大
茶友話，香港樓市同美國股市一樣，都係有自己嘅規律，話因為首長嘅因素造好，只係藉口，又或者最多係心理因素。如果睇番地產股，無乜邊隻因為奶媽上場飆升，就算主席係投票日係票站充當左林鄭粉絲嘅信和(083) ，股價都唔見得升左去邊。
講開賣樓，過去新盤開售都會利好地產股價，但呢次小陽春效應暫時唔係咁得，雖然新盤仲係賣得吓，但地產股就唔見得好郁。未來兩個星期，又有大發展商推出新盤，睇吓新盤效應係咪可以出到嚟。
美股慢溜調整，恒指反彈一下，收報24345，升152點；國企指數收報10425，漲63點，成交695億元。交投淡薄，資金就博一博，走去炒吓博彩股，銀河(027) 升上一年高位，報收42.65元，升3.5%；金沙中國(1928) 急升4%，收報36.25元。成日傳會係日本開賭嘅彈珠機股NiraKu(1245) 午後更一度炒高28%，高見1.05元；收報1.02元，升24%。
陸羽仁
金融High Tea 舊文
來源 source: http://hdfin.stheadline.com