Money Walker：
博盡搵錢的悲哀
■香港樓價升到上車盤唔食唔著20年先買得起。 資料圖片
特首選舉結果一如預期由被欽點嘅熱門贏得，有人慨嘆今後要落力搵錢移民逃離香港，亦有人話應該唔好理咁多閒事，積極搵錢改善生活先係最實際。總之無論世界發生乜事，「搵錢」似乎
都係香港人人生唯一真理。
錢幾時都要搵，可惜不問世事博盡搵錢都唔見得係人生出路，反而越投入搵錢，怨氣就越重。事關香港經濟停滯不前，靠學歷或專業資格都難以上流，樓價仲要升到上車盤唔食唔著廿年先買得起。想投資致富咩？好似騰訊（700）、瑞聲（2018）呢啲倍升增長股呢個時勢又有幾多隻。除非俾你捉到2007年、2009年同2015年呢啲單邊大升市，否則今時今日大多數人炒股，都係喺股海浮浮沉沉。
講真，今時今日環球投資主調三幾個月轉一次，要預先參透並部署又談何容易。好似特朗普提出嘅新醫改方案上周喺國會觸礁，就成為美股特朗普升市變回吐嘅藉口，「通脹再現」（reflation trade）投資主題暫時都要唞唞。
來季新投資主題暫未見影，不過維時4個半月嘅債弱股強局面終於有變，十年期美債息由3月上旬議息前嘅高位2.63厘，回落至近期嘅唔夠2.4厘。值得留意嘅係，喺特朗普當選至今呢個月，美債息技術上形成咗雙頂呢個見頂型態。由於債息下跌理論上有利息口敏感股，收息股同房託股會否重拾強勢，值得留意。
買收息股幫唔到你發達或移民，志在可以執番少少畀你去個旅行，短暫逃避嚇作為香港人嘅悲哀。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com