【實力取勝】點解我同心欣一人一檔直播？（陳承龍）（第120期）
2017-4-13 16:00:04
眾所周知，小弟同小炒王梁心欣一向friend底，我哋相識於DBC《小炒王國》，兩個極啱嘴形，因為炒股都係快上快落之人，雖然大家揀股風格唔同，但宗旨都係一個字：見勢就炒，所以一拍
即合。後來仲同佢夾份搞《港股策略王》，由好難做嘅紙媒，漸漸進化到有網站winmoney.hk，最近演變到「嶄新財經數碼互動媒體」，做視像直播，仲有純聲音版，唔想講個句小弟都要喺呢度講，其實呢個嘗試，根本創造咗一個比傳統電視、電台更互動嘅平台，主持同觀眾有互動，買中股票一齊嗌Go Go Go，買錯股又互相鼓勵大家要堅持，終有一天守得雲開，成件事好正面，唔係日日見到股票跌喺度哭哭啼啼嗰隻。
問題嚟啦，好多人問：嘅然策略王搞直播Live，點解心欣又搞個「Tasty Money添味財經」？等小弟話畀大家知當中嘅秘密啦。其實梁心欣一早有搞直播呢個idea，但當時小弟未諗到突破舊有框框嘅方法，例如點樣可以冇電視台咁悶，點樣可以多啲互動。心欣係一個諗到就坐言起行嘅人，佢就先搞一個Tasty Money，整個過程，小弟係知情同支持嘅，畢竟大家都係策略王嘅人，心欣用佢個名做牌頭去開枝散葉，一定唔係壞事。後來小弟諗到，喺直播時段表現多少少真性情，例如嬲嗰時爆小小粗、又或者直播時段「表演」落盤，類似真人騷嘅style市場會唔會受落呢？諗係冇用嘅，由click rate證明，呢條路係得嘅。
心欣Tasty Money開頭由幾百人睇，到依家閒閒地過千人，證明佢越做越好，小炒王並非浪得虛名。策略王直播室同樣開頭得百零人睇，到依家Facebook加 YouTube每日有近千人同時收看，仲未計聽純聲音版嗰批。直播財經嘅市場，根本係一個藍海，心欣同小弟表面上睇係兵分兩路，但其實係有默契地擴大呢個市場，根據資料，香港有1/3人口係股民，即係有成200幾萬人未接觸小弟或者心欣嘅節目，你話個潛在增長空間有幾勁呢？另外，策略王同事幫小弟做過資料搜集，市面上好多媒體都嘗試做股票節目直播，但無論老字號或者其他後來者，觀眾人數都谷唔上？咁點解Tasty Money同策略王直播室越嚟越多人睇呢？講到呢度大家明唔明？
因為越多來越人睇策略王直播室，小弟完全感受到大家支持帶嚟嘅力量，近排揀股真係如有神助咁準。例如喺中國糖果（08182.HK）復牌後叫大家狂搶，基本上0.25元下任買，最高上過0.49元，真係同派錢冇分別，糖果新主係娃哈哈太子女，即使出咗G.O.價，亦隨時會再爆上，要長期關注。另外，北京建設（00925.HK）食正雄安概念，日前喺「12點半陳承龍」推介後大成交炒上，證明有聰明資金介入，後市不妨再睇高啲。
實力取勝 - 陳承龍 舊文
來源 source: http://www.winmoney.hk