金融High Tea 2017年4月13日
百日計劃露暖意
2017年04月13日
港股走勢真係有啲估佢唔到！周二收市後，特區政府宣佈加辣打擊賣樓一約多伙，指數低開，地產股頂住唔跌，但大市有啲無神無氣，睇怕今日係長假前夕，應該買賣兩閒，諗唔到臨近收市，指數忽然掃高，騰訊(700) 逆市爆升，好有谷高指數嘅味道。
加辣照升 相當頑劣
港府係長假前出招打擊一約多伙買家，要求用一張約買多個單位的買家，就算係首置都要按例俾15%印花稅。當局揀係呢個時候出招，好明顯係睇到幾個大盤都係復活節前後嘅賣樓檔期開售，一於先下手為強出手。對一約多伙的大手買家加辣，相信會令好多諗住掃多個單位的買家「縮沙」。呢類型買家過往只係零星出現，而家就去到佔樓盤買家兩、三成，收緊稅例令呢批買家無辦法買「平樓」，咁都會釋放番多啲伙數出嚟俾單頭買家，可以等多啲人可以買到樓。另外相信會令新盤去貨速度減慢啲，發展商加價無咁狼，雖然對於樓市癲況起唔到治本作用，暫時就叫做止吓咳、降吓溫。
收緊首置稅呢招唔算好辣，所以地產股開市無乜跌，下午仲跟住個市升，大有趁壞消息兌現咗，假期賣樓前炒炒嘅味道。而家樓市熱成咁，發展商加價少啲都賺到笑，炒股一萬年太久，所以有人就趁呢兩日就走一轉。有盤開嘅長地(1113) 收升0.95元，升1.8%，報54.8元、新地(016) 收升0.9元，升0.8%報117.7元。加辣地產股仲要升市收場，都唔知話個樓市頑強，定係話佢頑劣。另外騰訊控股(700) 急升2.7%，收報231元創新高，推動恒指收報24313，升225點；國企指數收報10208，漲42點，成交都有718億元。
講起買樓，有中環茶友話會趁假期北上睇樓，佢嘅理據之一，係中美兩大元首見咗面，初步睇嚟習大大應該搞得掂特朗普喎。
係習特會之後，包括英國《《金融時報》》在內嘅外媒開始漏啲料，披露兩人會談氣氛同成果。一個講法係中國將在金融領域投資以及牛肉出口方面向美國加大開放市場，以幫助避免貿易戰爭。兩國領導人會晤結束前後，美國提出了「百日計劃」(100-day plan)，雙方將圍繞貿易領域的合作展開為期100天的談判，以縮小中美之間的貿易不平衡性。
特朗普勝在有數講
這項計劃被認為是兩人在海湖莊園首次會晤的最重要成果。目前還未有關於這項計劃的更多細節，估計中方的讓步會涉及放寬美國農產品進口，放鬆美資在大陸投資金融業，甚至減啲美國車入口關稅。中國方面則尋求為中國企業在美國投資獲得更多保護。
若按此思路，部份中國相關企業，會受到一啲衝擊。不過，大陸多年來已習慣咗應對同美國嘅貿易談判，總體上佢唔會犧牲自己嘅重大利益去達成結果，例如入口美國農產品多咗，咁咪入少啲其他國家嘅產品去中和衝擊囉，好似買多咗美國安格斯牛，就買少啲日本和牛，有乜事咪叫日本人去同美國佬講囉。入多咗美國新奇士橙，就入少啲台灣、日本，韓國水果，呢幾個國家或地區自命係美國細佬，到時俾大佬出賣咗，真係投訴無門。
特朗普上場，大家都覺得佢難捉摸，茶友話而家睇嚟佢都係一個生意佬，咁即係有著數就有數講，咁對大陸嚟講短期就算有啲影響，但換番穩定嘅發展環境，依然係大大有利，所以睇到呢啲消息，令佢對大陸樓市同經濟信心大番啲。唔知係咪真係咁啱，大陸嘅內房股又湧咗上嚟，深圳孖寶深國(152) 升咗0.5元，報13元，深控(604) 仲勁，升咗0.27元，收報3.71元。
陸羽仁
金融High Tea 舊文
來源 source: http://hdfin.stheadline.com