【不問價追】國美雙雄 14.04.2017（小炒王梁心欣）（第120期）
2017-4-13 17:00:26
做投資決定時最怕「左一巴右一巴」，今日大市大升靠大股，聽日大市唔鬱就炒細價股，講真，大家唔係美斯咁識得扭毛巾架麻，左換右換，左扭右扭，咁樣做真係好傷身又傷心，所
以遇著呢啲市況，都係靜一靜、諗一諗，因為好易做錯事。咁長篇大論，因為4月得17個交易日。專欄出街之時，仲得返8個交易日㖭，錢就算到，都唔會大堆頭湧來，因為假期因素令錢卻步，呢點認真不可忽視。繼續「炒股唔炒市」先係上策。
細價股靜咗好一段日子，我手上的「持久貨」都終於有收成了！追蹤開本欄的朋友，國美金融科技（00628.HK）係咪坐到唔記得咗呢？呢隻股份係我倉裡面由頭坐到尾。喺星期一大升當日我都終於可以鬆綁，輕微沽出部份貨。但我知道呢類型嘅股份一係捱到你死下死下，一係升到飛天，所以手貨唔敢沽清，仲打算一回落就加碼，留返條根中過六合彩都好。睇返隻股，出通告話換CEO之後，資金湧入，成為星期一嘅升幅最大港股，急升四成。眼見國美（00493.HK）呢期經常做回購，而且股價相當硬淨，我相信呢系的股票將會有翻身之日。
小炒王推介過國美兩次，一勝一負。一次係大時代嘅時間（即2015年）由一蚊炒到上兩個二，當時自己揸咗正股加埋認購證（好大膽嘅行為）結果來一個雙贏。不過， 2016年再次將資金投入國美嘅時間，就輸咗兩成觸及止蝕位，現在仍記憶猶新。早兩篇專欄提過，今年要摒棄舊思維，擁抱新想法，醜股隨時變靚股，尤其是北水實力不容置疑，當年將國美推向高峰的北水點會走漏眼呢？今轉美圖（01357.HK）、IGG（00799.HK）完美示範北水嘅暴力式炒作，所以今次決定係一蚊邊位再次買返國美。
坊間不定時有傳聞指黃光裕會提前出獄，最明顯不過就係黃光裕早前喺美國買豪宅，唔知係咪提前出獄的先兆呢？如果話事人再擔大旗，國美系雙雄又有重生之日。
不問價追 - 小炒王梁心欣 舊文
來源 source: http://www.winmoney.hk