中環在線：唔驚開戰
黃國英勇闖北韓
■Alex趁假期去咗平壤，大讚旅程豐富好玩。
美國同北韓隨時擦槍走火，香港人連去南韓賞花追韓星都巧驚驚之際，基金經理黃國英（Alex）呢個復活節假反而膽粗粗去咗北韓旅行，仲話去之前驚都未驚過，並以第一身話畀大家知，平壤非常之平靜！
Alex同太太
今次約埋客戶、學生、同事一行7人，上星期五跟團從北京坐飛機直抵平壤，玩咗4日，星期一坐5個鐘火車返回中國丹東離開。
Alex話，成個行程除咗去市中心嘅博物館、廣場、參觀建築同地鐵之外，邊境嘅板門店同郊區嘅國際友誼展覽館都有去，令佢體會到平壤繁華地區同外圍嘅落差的確好大。導遊又罕有地畀咗少少自由時間佢哋行咗一陣街，仲睇咗一個水準非常高嘅雜技團表演，佢話旅程豐富好玩。
感受唔到緊張氣氛
至於坊間一直盛傳會受監視、沒收電話、路人演員等經驗，Alex話冇遇到，極其量只係被要求刪走一、兩張相。最大感受反而係抵埗後，國航停飛兩地航線、高麗航空延遲令外國記者變相受困，仲有盛傳平壤撤離60萬人等傳媒營造嘅緊張氣氛，佢身處平壤丁點都感受唔到。
北韓畀佢最大感覺係「一個好耐之前嘅大陸，所有人與事，都好似好耐之前經歷過咁」，而當地封閉同香港開放嘅反差，亦令佢有好深嘅反思。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com