【實力取勝】唔信金正恩射得成（陳承龍）（第121期）
2017-4-20 16:04:09
寫稿呢一刻，小弟已經忘記曬放假嘅relax心情，繼續喺股壇作戰，奈何呢個復活節假期返嚟第一日（4月17日），未重覆到2015年大時代嘅爆升走勢，唔升不突止，仲要跌穿24000點，向牛證重
貨區23800進發。雖然假後出師不利，熟識小弟嘅讀者同朋友都知，我陳承龍係樂觀主義者，贏固然係好，但輸錢都唔會輸陣，你日日喺度哭股喪，機會真係嚟啦都把握唔到啦，係咪先，話唔定呢篇文見街之時，恒指已經升返仲要升凸呢。
講到底，小弟仍然睇好後市，深信「市底強、市面弱」，呢排個市況弱，只係假象，爆升仍然可期。此話何解？就好似內銀股咁，舉個例建設銀行（00939.HK），花旗、法巴、JP Morgan、渣打同中國證券（即係北水）都喺6.1-6.2元左右大手建倉，一來係貪佢6月底除息，有成3毫子港幣，真正目的梗係博佢升，要財息兼收嗰隻啦。早前嘅升市，好多都係聰明資金，4月呢一浪回返，佢哋根本走唔到，而且散戶參與度唔高，何來大跌呢？
另一個大家好關心嘅因素，就真係北韓金正恩又想試射核彈，但又試射失敗，睇往績，當一個人做一樣嘢成日都失敗，下次再做成功嘅機會率係幾多呢？梗係低啦，即係又會失敗咯，如果金仔有能力、有心開戰，吹到吹到成功發射啦，依家試射又好似掟錢落海咁，特朗普會唔會驚你呢？小弟絕對唔覺得真係會打得成，故此相信呢排「市面弱」只係正常回調，之前好多股嘅RSI炒高咗，畀佢哋回陣氣都得啩，如果大家睇到呢度仲驚嘅，唔睇好後市，咁咪炒個股咯。小弟早輪推介嘅利基控股（00240.HK）、華顯光電（00334.HK）同北控醫療健康（02389.HK），跌咗一輪咪又創高新，所以呢，買嗰時只要計啱數，畀啲信心自己，呢個世界好似前輩曹仁超講嗰種「朝種樹晚板」畀啲耐性同信心坐嚇，好快會見到黎明。
打過波都聽過啦，有信心未必會贏，但冇信心一定會輸丫嘛，係唔係？之前嘅中國糖果（0818.HK 2）就係最佳例子。所以，大家畀信心自己，咪買完跌三兩格又驚乜驚物先得㗎！
實力取勝 - 陳承龍 舊文
來源 source: http://www.winmoney.hk