智取大市 - 晉佳 2017年4月24日
智取大市：一個重估的理由
■金山新CEO鄒濤同騰訊關係良好，對進一步合作無往而不利。 資料圖片
科網股金山軟件（3888）弱咗一排，跑輸曬畀騰訊（700）、IGG（799）等同業，上星期五公佈，旗下遊戲開發業務西山居引入騰訊，以4.85億港幣，出售4.34%西山居股權，究竟幫唔幫到股價變強？
雖然金山軟件同騰訊一直有合作，但同騰訊QQ捆綁嘅軟件金山毒霸，之前太多彈窗廣告，彈到QQ用戶扯火，市場憂慮金山廣告收入下跌。不過，今次西山居單deal有助扭轉形勢，因為引入騰訊，有三個重大意義。
第一，遊戲業務長期係金山主打，同騰訊加強遊戲業務合作嘅話，有助市場對金山有返增長預期。
第二，前增長點獵豹喺美股上市，金山早兩三年靠獵豹推高估值，但叻極都要有控股公司折讓，貴極有個譜；至於西山居冇上市，被視為增長點嘅話，冇埋控股公司折讓，推高金山估值比過往更容易。
第三，金山新CEO鄒濤舊年12月接任，鄒濤本來就係西山居領軍人物，今次騰訊入股西山居，證明騰訊撐金山、撐鄒濤，對進一步合作無往而不利，金山換人後同騰訊關係良好，大家唔使驚。金山如意算盤打唔打得響？就睇今日股價，如果反應良好，應該能夠Keep住升落去。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com