經濟客艙：供樓供到80歲
■買樓按揭年期最多30年，50歲開始供，要供到80歲。 資料圖片
未必每位外父都好似「天王嫂」Moka嘅爸爸咁幸運，搵到輩份幾乎「同起同坐」嘅女婿，仲要唔係搵自己個寶貝女笨。
「真係恭喜你呀爸B！升呢做外父！」老豆聽到我講呢番說話，塊面仲
黑過墨鬥。話說已經踏入盛年好耐嘅家姐終於出嫁，作為細佬嘅我聽到都好開心。點知老豆好似呷醋外父上身咁，係咁話家姐被老公搵著數。
「你家姐都唔細啦，仲要搵個大過佢廿年嘅老公，你話唔擔心就假囉。」我諗住氹返老豆開心，「老老豆豆，做人不能太保守，時代唔同咗，你都要好似國貨城嘅外父咁，攞出少少幽默感出嚟喇！外父都可以識跳識唱對你愛、愛、愛不完！」
老豆聽完好似仲更加嬲，「如果做到國貨城嘅外父就唔駛愁啦，最弊係你家姐同呢位未來老公仔話要入市買樓。」老豆話呢位準未來女婿，好似今年都踏入五十歲，同家姐兩個人夾手夾腳供層500萬納米樓。「年齡差距呢樣嘢講真有咩所謂，但年齡差距講到供樓就唔同喇喎，聽講佢哋仲想攤長到30年供，即係供到粒孫仔出世，層樓都未供完喎。」老豆好似未講完，未來女婿同你家姐相比，頂盡做多十幾年、65歲就退休，層樓都供到一半；你家姐仲要捱多十幾廿年先搞得掂，點會唔擔心呀。
作為Generation Rent嘅我，聽到家姐供樓供到七、八十歲，諗起都覺好遙遠，咪搞！家姐總算同未來女婿冇伸手要老豆畀首期，更加好彩香港買樓按揭年期最多30年，唔駛耗盡兩代人嘅積蓄同時間，去供層幾百呎嘅樓。
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com