智取大市：
金隅勝在有清明
■噚日A股復市，概念股供應大增，金隅於是先急升後回。 資料圖片
雄安新區被官媒唱好為「千年大計，國家大事」，雖然長線規劃未殺到埋身，但短線更重要嘅係，大陸資金炒唔炒。
金隅（2009）貴為龍頭股，喺佢2015年年報Ctrl F去search嚇容城、安新同雄縣
，係0個結果；而金隅位處河北市項目，同雄安新區距離仲遠過北京同天津市，事前連龍頭股都唔發展呢一區。金隅最大受惠嘅因素係持有旗下河北水泥龍頭冀東水泥約50%股權，既然冀東水泥獨注受惠雄安新區，又喺A股上市，大媽又何需要買金隅呢？
雄安新區消息上周六見光，結果金隅賺咗星期二清明節假期前A股同港股通休市一日，資金逼住鬥快反映消息，喺香港狂掃金隅。噚日A股復市，概念股供應大增，金隅於是先急升後回，皆因佢股價表現，或許已反映A股冀東水泥連續幾日升停板。長遠而言，金隅呢個政策概念，仲要畀控股公司折讓。
或許拜得神多、自有神庇佑，金隅股價得以連升兩日，但呢一刻市賬率依然1倍唔夠，就反映市場事前根本睇唔起呢隻股，或許本來經營能力遜於其他水泥股，所以估值一直低殘。上述幾個因素七除八扣之下，吸引力已經欠奉，之後會點？單日超過30億成交，相信今後已經「美圖化」，chok到阿媽都唔認得。
晉佳
http://fb.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com