【實力取勝】做好準備贏一舖就夠（陳承龍）（第119期）
2017-4-6 16:00:46
呢排為咗搞網台，不斷同好多新朋友接觸，只要熱誠、啱嘴型同有共同理念，都會研究嚇大家喺「策略王直播室」有冇合作空間。期間同「股友K」吹水，佢親身證明炒股贏大錢先決條件唔係有錢開戶口，而有要有
積極嘅人生觀，成日自怨自艾、鬧呢樣鬧嗰樣嘅人，有股票喺佢面前，都唔識發掘，發掘到亦都唔會買。
股友K上世紀90年代出嚟社會做事，當年佢未讀完書，夠18歲已經開咗股票戶口，非常爛炒，係正宗炒鬼，一出嚟，梗係久不久都交嚇學費，讀電子出身嘅佢，一邊打工，一邊炒股票，生活都唔錯。出咗嚟做嘢幾年後，「舊同學S」喺外國讀完電子工程碩士返嚟，搞咗個舊同學gathering，點知同學S話自己返嚟香港，第一份工得7000蚊工，好鬼唏噓，點知同枱有個讀完中二就冇讀書嘅同學，由於早出嚟做嘢，已經有30000人工，但呢個人話：「最衰我冇讀好書丫，我細佬讀到中五，今年已經搵50000蚊人工啦。」舊同學S聽完真係喺個心入面喊咗出嚟，讀得書多反而搵得少，股友K聽到呢度，真心覺得炒股又有型有搵到食，一日10幾20萬上落都閒閒地，所以後來佢醉心研究炒股，由於寫嘢唔差，所以做埋財經記者，邊做實事邊炒股，雖然有贏有輸，但總算贏多過輸。N年之後，呢位股友K，就已經成為咗《港股策略王》嘅圖表分析專家圖太郎啦！
所以計小弟話，炒股就係等待賺錢嘅機會，只要做好準備，贏一舖就夠，近日最好嘅例子，就係中國糖果（08182.HK）。其實呢隻股票，小弟舊年喺0.1元左近已經多次推介，原因得一個，就係市值低，殼價都唔夠，結果去到上月底，已經升到0.15元，跟足買都贏咗5成，點知無喇喇爆多兩棍，後尾仲停埋版。中國糖果31日公布主要股東跟潛在買家訂立意向書，可能收購及自願要約，潛在買家可能自願要約以收購該股不少於50%，意向書至4月30日止，有關買方為娃哈哈創辦人宗慶後之女宗馥莉。如果睇完呢份通告勤力少少去搵資料，或者好醒目咁follow策略王啲news，都會知道唔追貨唔得，事關娃哈哈集團從未上市、喺全國29個省市自治區有80多個生產基地、總資產達400億元⋯⋯睇完都知勁啦，但計一計數，中國糖果停牌前收0.188元，市值得3億元鬆啲，娃哈哈買得，唔會咁奀豬卦，所以小弟預佢即使高開三成左右，即係0.24元左右，可以再追貨都值博，因為即使升到0.4元，市值都仲係7億唔夠，一個有400億元資產嘅集團買嘅第一隻殼、市值10億都未夠？咪玩啦。所以4月3日中國糖果復牌之後，喺0.25元樓下狂掃，即日都有3成回報，算唔錯啦。所以炒股票，知識同膽色缺一不可，同埋要有正面嘅想法，否則會錯失、或者有機會都把握唔到。隻8182似乎仲有得去，一日未出全購要約價，一日仲有得炒。
實力取勝 - 陳承龍 舊文
來源 source: http://www.winmoney.hk