Can Bank：
美軍突襲敍利亞的啟示
■上任僅三個月的美國總統特朗普早前決定向敍利亞開火。 資料圖片
上任僅三個月的美國總統特朗普決定向敍利亞開火，理由是當地有小鎮被化武沙林毒氣襲擊，軍事學家就話，今次侵侵出手恐嚇性質居多，又正值中美領導人會見之時，所以佢哋覺得今次行動警
告對象係中國、俄羅斯同北韓；點解係中國？大體上意思就係你唔同我同一陣線嘅，我自己都有本事搞掂佢。
講到我哋熟識又有啲陌生嘅中國，大家都估到，咁易被嚇到嘅就一定唔係中國，因為你唔容易嚇倒而唔嚇你嘅都唔係美國。換言之，呢類嘅突發式發炮，相信會陸續有來。
美國前總統奧巴馬辛辛苦苦喺過去幾年逐步削減軍事預算至低於6,000億美元水平，一下子就被侵侵推番上去6,000億美元以上。侵侵本人接受傳媒訪問嘅時候，亦都放風表示美國核武已經相對落後，相信預算未來只會有增無減。
畀個概念大家，今次美軍所用嘅戰斧巡航導彈，一支價值120萬美元，今次用咗59支即係總值7,080萬美元，目的係恐嚇一下。美國海軍一艘巡航母艦載70架各類型飛機，裝備300至400支戰斧，一場區域戰爭通常用6艘母艦，各類飛機超過400隻，導彈逾2,000支，淨計導彈都值24億美元，都未計飛機同母艦。再舉例：波斯灣戰爭，美軍共出動超過20艘艦艇。
與其喺香港搵啲唔係太關事嘅軍工股，不如去美國搵機會，大家不妨留意嚇軍工股Lockheed Martin，佢最大客戶就係美國政府，亦都係美國及英國政府部門最大供應商；另一隻係Raytheon，呢間正係戰斧導彈嘅生產商，兩者近年股價走勢均穩中有升。
散子
本欄逢周二刊出
散子
Can Bank - 散子 舊文
來源 source: http://hk.apple.nextmedia.com