【實力取勝】景百孚又畀機會我發達（陳承龍）（第123期）
2017-5-4 16:00:12
又係每個禮拜最艱辛嘅時候，講真，邊有咁多嘢講，尤其平日已經日日都講嘢，要講嘅都已經講曬，不過，如果真係要講嘅，都可以喺呢度做啲深度嘅分析，先講個市，近排小弟總係有好強烈嘅感覺，總係覺得個
市係要爆升，點解?因為身邊有好多人唔信個市返嚟，而過去好多次嘅升市都係喺大家不知不覺間出現，都大家都覺得個好掂嘅時候就係見頂之時。好似剛過去嘅禮拜二，我哋嘅好朋友唐紫睿Hazel咁，佢上咗嚟我哋直播室做節目，佢一句話個市唔夠成交，叻極有個普，首先我要強調我唔係當Hazel係燈，但只不過佢仲係好有一般散戶嘅心態，呢嚇幾有指標性。
仲有一點值得一提，連Hazel之前一直都睇好隻騰訊（00700.HK），但依家佢都話嫌貴，咁就正啦！你諗真啲，依家邊有散戶敢追隻騰訊？我敢講，10個都有兩個，咁究竟邊個敢夠Pop係咁買上嚟，既然唔係我同你，肯定係一啲超級勁嘅錢囉，單憑呢一點，我已經覺得個市仲有得去囉。至於短期再推升個市上嘅大隻藍籌，我覺得係隻滙控（00005.HK），你睇隻渣打（02888.HK）之前剛出嘅季績靚到，滙控可能都有驚喜，仲有近期港股通有好多中資儲緊佢，同埋佢嘅相對強弱指數又開始轉強，似乎係時候要爆升啦。
個股方面，小弟短期一定係睇實隻企展（01808.HK）。首先，我要多謝景百孚先生，因為小弟2015年其中一桶金就係景生嘅仁天科技（00885.HK，前稱福方），呢隻為我帶嚟超過10倍回報，如今景生又再出手搞隻企展，我只可以講，機會咁啦！查景百孚係民企大亨，1970年出生於山東省煙台市，1996年定居香港，因此也算是老香港了。佢喺2015年的《福布斯》華人富豪榜中排名165位，2016年的胡潤房地產富豪榜排名第38，被估計身家有115億元。不過，佢嘅嘉年華國際（00996.HK）嘅市值同埋隻仁天科技嘅市值都唔止呢115億囉！
如今景百孚正式成為了企展控股嘅大股東，根據心理炒股法，佢嘅另外兩間上市公司嘅市值分別是百多億元和數十億元，但企展則只有幾億元，再者，另外兩條炒股規律是第一，炒新不炒舊，第二，炒仔不炒乸，企展作為景百孚系最新獲得的子公司，再加上超低的市值，似乎不夠其慣常的胃口，因此，我判斷呢隻將又是一隻充滿憧憬的潛質股，如炒到上5元，都係得嗰約30億市值，更關鍵嘅係，大家有冇留意到，景百孚今次係以每股1元將隻企展全購， 但宣佈全購之後，企展嘅股價長期企喺1元樓上，但睇返要約結果，都有好多股東接納今次要約，呢嚇已經說明今次全購，其實全購只係景百孚將佢喺條街嘅陰手貨透過全購回歸其手上，如今大貨已明正言順在手上，仲唔大炒一番，所以今次我會同佢博老命博佢幾個開。
實力取勝 - 陳承龍 舊文
來源 source: http://www.winmoney.hk