智取大市：淡友太多 應未見頂
■冠捷股價破旗而上，買呢隻好過高追其他已勁升嘅股票。 互聯網
港股破頂，證明有人拎真金白銀，搶緊藍籌股。貴買其實唔一定係傻仔，因為要贏，只要能夠將股票送畀最後接火棒者，就已足夠。
星期二各大報章財經版頭條，包括「港股五窮月料先低後高」、「5月恐防調整基金越
升越沽」、「五窮月凶多吉少脫困要靠外圍」，個個化身淡友，剩返《蘋果》港股標題「港股五窮月勿太悲觀」，算係企喺好友陣營。講緊恒指突破20個月高位，樓上蟹貨有限，沽壓又少，竟然各大報章十居其八都睇淡，可想而知近期有膽掃貨者並不多，股市超買呢個情況，仲未形成。
何謂超買？就係有條件買股票嘅人，用盡所有資金投入股海，與此同時，再冇新資金出嚟接貨，股市隨即見頂。最後接火棒者都未出現，睇嚟未見頂吧。
個股嫌舜宇（2382）升太多，高追風險大嘅話，小弟不厭其煩地又再推介冠捷（903），基本因素方面已多次提及，恕不詳述，而股價喺星期二正式破旗而上，早段急升而下晝成交縮減之下輕微回吐，但無阻突破形態，呢隻係咪比較追得落手？
晉佳
http://fb.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com