炒科技股有路捉
2017年05月04日
昨天港股佛誕放假，周一又係5.1假期，兩個日子中間日開咗一日市，恒指周二本來無乜力，去到下午仲係軟軟哋，但臨近收市就扯高，結果創咗21個月新高，同傳統五窮市無運行嘅感覺有啲唔同。
美股周二就係議息前企穩，杜指數市報20949點，升36點，科技
股繼續向好，納斯達克指數收市報6095點，升3點，標普500指數收市報2391點，升2點。內地股市就繼續弱弱地，上證綜指收跌0.3% ，深成指收跌0.4%。
恒指係假前收報24696，升咗81點；但國企指數收報10173，倒跌46點。恒指跑贏國指，主要係科技股王騰訊(700) 好強勢，加埋濠賭股表現唔錯，由於兩者都唔係國指成員，令到恒指、國指出現背馳，睇嚟資金想買吓股，但最近市場講緊內地經濟反彈後係咪開始見頂，加上加強監管嘅陰影，令到中字股暫時缺乏概念，所以大家就落注係啲非中資股身上，市值大嘅騰訊就負起做火車頭攻關責任。
假前騰訊再攻頂，全日升逾2%報收248.4元，不僅為全日高位，同時亦再創新高，以佢的磅數咁升法真係幾犀利。美股而家炒緊納指迭創新高，蘋果季績雖然略差過預期，股價借勢回吐，但佢遲啲出新款手機係當中一大概念，手機設備股同樣強勢，舜宇光學(2382) 曾見67.8元創新高，收市升4.7%報67元；同樣破頂的瑞聲(2018) 一度高見116.5元，收跌0.7%報113.4元。
瑞聲猶如小蘋果
瑞聲老闆早前曾豪言想增加派息，令股東收息可以超過當年上市價，記得瑞聲科技首日掛牌收報3.6元，已比當年招股價2.73元高，因為當時大家已睇好佢嘅前景，股價接連幾年大漲小回，最高迫近10元水平，直至2008年金融海嘯的跌市，當時瑞聲上市幾年，通常係公司上市後常常遇到發展瓶頸的時間，股價掉頭回落，曾經係年底插穿招股價，報2.35元，當時好多股民相信後悔點解無係高位沽貨。不過，呢個亦係近9年買入佢的最好機會，之後佢股價隨著蘋果智能手機大受歡迎，一直大漲小回無點跌過，但相信除咗大股東，唔係咁多人會坐到而家。
有中環茶友問，咁瑞聲科技仲買唔買得過呢？以最新收市價113.4元計，佢市盈率31倍，息率1.3厘，睇落價高息低。佢一年低價係去年12月的51.15元，咁即係話現價比一年低價升咗超過一倍，用估值計瑞升已由略貴進入好貴的水平。如果睇番佢上市以來表現，基本上可以話佢係「小蘋果」，市值隨著智能手機普及飊升，所以如果要答佢買唔買得過，等如買而家蘋果買唔買得過。
蘋果在智能手機市場有優勢，係納指最大的幾間公司之一，當然有好強大嘅實力，但如果話佢會繼續有過去10年嘅高速增長，你又信唔信呢？所以而家炒手機設備股，結論大抵都係入市太遲，發唔到達啦。
仍有機會炒落後
除咗恒指成份股嘅瑞聲，建滔化工(148) 、建滔積層(1888) 同比亞迪電子(285) 都爆升。比亞迪電子(285) 公佈截至2017年3月份止首季業績，純利5.3億元人民幣，按年增長2.96倍，每股盈利0.24元。瑞信上調比亞迪電子目標價四成，由9.6元調升至13.5元，新目標價等同2018年市盈率10.2倍。佢股價單日急升11%，造13.14元。由於呢類大股已經升咗好多，如果要捉路，估計市場會繼續係同類型股份搵啲落後嘢炒吓。
另一類有啲水尾概念係5.1小長假效應。今年大陸訪港澳旅客回升咗，一大理由係美國整個薩德系統去南韓，搞到阿爺要限韓，大陸客唔去南韓，於是南韓之失，成為港澳之得。濠賭股同零售股都炒吓，澳博(880) 升0.66%，收報7.6元；新濠國際(200) 升0.5%，報16.08元。不過，龍頭嘅銀娛(027) 、金沙(1928) 已經無得郁，而家入短線睇都有啲慢啦。
陸羽仁
金融High Tea 舊文
來源 source: http://hdfin.stheadline.com