唔買貴嘢2
2017/07/26 09:47:35
網誌分類: 經濟
美股杜指升100點，但納指升1點，科技股上唔到，美股有啲上升動力缺缺。
昨日寫文講樓價，惹起好多回應，其實之前想咗好耐篇文好唔好寫，結果都決定寫，主要想講清楚一些投資的基本理念。
我寫文想同大家分享所見所聞，想分享一些投資基本心德，想提醒大家唔好做一些可能會輸身家的事情，所以才寫文。
早前有朋友whatsapp我，問我一隻股票，話聽人講會點升點升。我看看不見它的本業有何發展，明明是一隻炒股，但結果只是支吾以對。因為怕叫人不買，佢過幾天就炒起，若然好快升咗一兩倍，阻人發達，實俾人鬧爆。
我天天寫嘢，提到唔少股票，短炒長?，環境變化，未能兼顧，所以每到星期日得閒一點，寫星期一報紙的稿，有機會多講一些投資概念，希望幫到大家。我認為散戶三更窮五更富，主要他們在投資市場面對很強的對手，有些更造假搭棚，騙散戶落?，所以要唔輸(先唔講贏)，要搞好理念。
我第一個理念是叫大家分開「投資的我」和「投機的我」，投資的我要看基本因素，睇前景睇回報，唔平唔買。投機的我明知係炒，唔怕買貴嘢，只要順住個勢去，識得落車就得，但我都會叫大家避開太假的東西，因為而家的假嘢興向下炒，一入走唔到。
買樓是否一種投資都係一個問題，《富爸爸窮爸爸》的作者曾形容美國人買樓自住是一個消費。我覺得有時都啱，若然你買樓買到好超越自己的收入水平，自住又唔賣，又無收益，遇上間樓又唔升，你買樓幾十年，只作為用家，其實只是作了一個消費，呢個概念有啲怪，但在過去美國樓一兩十年可能升少少的情況下，又有一定道理。
即使當買自住樓?7年以上是一項投資(?7年以下稅沽出獲利稅局可能抽你利得稅)，而且買樓動輒3幾百萬，係人生最大投資，買貴咗好傷。可能將一生黃金時間2、30年積蓄花掉，都係好大件事。一生幾件事最大開支:買樓、供養子女、消費，這幾件事做好，可以有錢養老，做不好晚年袋中無錢有啲慘，而家保險公司開始假設人的壽命100歲，到90歲用哂的錢你話幾慘。我自己的策略是作買樓咁大投資唔好買貴，否則一供20、30年，會供哂自己的收入。
自住是一個實質需要，唔買樓可以租樓，但面對的問題是租金上升，隔兩三年搬很煩，而且結婚無樓外父可能睇你唔起，這的確是很多人想買樓的考慮。
我第二個理念是「投資的我」不要買貴嘢，理念從巴菲特抄回來。唔買貴嘢的問題是很易錯過近期會升的東西，所以對又貴又近期可能升的的東西，我會以「投機的我」來處理，買香港樓近年要俾好多稅難投機，所以不作投機買樓的建議。
巴菲特買東西一定要平，又要睇佢的基本因素，睇佢生意掂唔掂，睇長線現金流如何。香港樓的基本因素是香港經濟，本地經濟麻麻，打工收入增長不快，樓價愈升，愈脫離人的購買力，這是真正的離地。香港連續6年是全球最不可負擔的樓市，其樓價中值對個人平均收入倍數高達19倍。內地最宜居大城是重慶，樓價只是收入的4倍(唔好怪我又講大陸樓)。在經濟發展快的地區，租金收益低比較正常，因為打工仔的收入在急升中，未來租金上升有合理基礎。香港是成熟經濟，租金收益低是貴。貴的東西有泡沫，未爆時好開心，爆起上來會令人損手。
巴菲特是全球第二、三有錢人，他唔買貴嘢的心法，值得學習。呢啲做法睇落好笨，短線發唔到達，長線可以到岸。特別我地唔係要做香港首富，只希望退休時財務自由，可以輕鬆養老，所以「唔買貴嘢」的心法好重要。(有時唔買貴嘢都要輸，但只要買的是有基本因素的東西，都有得守)
我講咁多，係想話俾大家聽，樓價係由貴變成極貴(當然可能變成超貴)，當屯門20、30年舊樓都賣到過萬元一呎時，打死我都只係租，唔會買呢的樓。這就是我想堅持的觀點。
陸羽仁
回應總數
陸羽仁 BLOG 舊文
來源 source: http://blogcity.me