金融股易搵概念
2017年07月26日
港股差唔多連升兩個星期後，疲態都幾明顯，本來以為個市要調整吓，點知喺金融股單天保至尊下又升幾點收市，睇嚟大戶唔係咁想俾個市唞下。
滙控天時地利好轉
港股好淡爭持都幾明顯，上下波幅僅89點，最多升42點，高見26889，最多則跌47點，低
見26799，最典型係隻騰訊(700) ，升創新高後倒跌收市，佢破頂高見304.8元後回吐，跌0.2%，報301.6元。騰訊周初升破300元收市，好多人話佢成功破關，但呢啲咁大嘅心理關口，唔係咁易企得穩。趁佢上衝之際，獲利回吐嘅沽貨就出嚟計數，若然心急追入就中招。正常嚟計呢啲大關口要衝多幾次先真正破到，尤其是成個科網股板塊累積升幅都幾大，有人話騰訊升完再升，氣勢真係好強。不過，佢氣勢強唔強都好睇外圍，因為外圍科網股經上個月大插後，跟住又升過。係呢個背景下，騰訊可以炒完再炒，所以騰訊表現仲係好受外圍科技股影響，如果資金未喺科技股撤退，咁股王就會喺高位尋頂，但外圍科技股下插的話，佢喺呢啲重要心理關口都好難一口氣破關而上。
科技股王洩氣，有點意外係舊股王滙控(005) 爆發，將恒指推上高點，收報26852，升5點，咁係咁意都叫做升左，國企指數就收報10782，跌38點，成交跌番落去796億元。
大笨象發威，市場解釋係大行看好滙控下周公佈嘅中期業績，刺激滙控股價午後急升2.3%，報76.7元，為表現最佳藍籌股，為恒指貢獻65點升幅，成為升市主力。同樣喺下周公佈中期業績嘅恒生(011) 亦升0.73%，報165.7元。另一隻國際銀行股渣打(2888) 都升左2.3%，收報84.8元。滙控炒業績，有啲係藉口，主要係依間銀行嘅經營環境同監管環境都改善左，天時地利好左，想搞嘢自然易左，所以話佢業績惹憧憬，呢個係表面理由，最大動力仲係行業環境改善，所以可以見到唔係佢一隻升，而係大隻銀行股都升。
金融股造好，連帶積弱多年，無做股王好耐嘅宏利金融(945) 都升到近年高位，報收158.2元。宏利向好理由之一係美國息口向上，利好佢嘅投資收益。近排佢升得快左，就唔單止係利息環境改善，而係趁住呢個機會，集團考慮分拆美國嘅保險業務上市吸水。金融業唔掂，好似宏利呢啲巨無霸資產唔值錢，但環境好番，佢就多左好多玩財技嘅本錢，所以話憧憬業績或個別因素係表面理由，最重要係天時地利唔同左，咁管理層就容易有計搵水。
呢啲環境改變嘅升市，通常可以延續耐啲，呢個係我今年睇高金融股一線嘅原因，所以雖然大笨象創左近年新高，但都唔使太心急一下食晒胡，啲坐艇股都係，既然等左咁耐，就算想鬆綁都唔使咁急一下子就沽清。
和電本周決定食粥食飯
噚日有幾間公司宣佈業績，和電香港(215) 公佈6月底止中期業績，純利3.24億元，按年跌左10%，每股基本盈利6.72仙，派中期息每股3.9仙，去年同期派息為4仙，佢業績倒退其實係意料之內，股價就跌近2%，報收2.98元。不過，和電當前最大單嘢係佢會唔會賣固網，外電引述消息人士透露，多間銀行聯合為和記電訊香港(215) 旗下和記環球電訊的兩個競購財團，提供貸款融資。12間中資及跨國銀行簽署承諾函，為私募股權公司TPG資本與安博凱組成的財團，提供77.8億元的五年期優先貸款。消息人士表示，預料在本周宣佈中標者，所以和電短期股價食粥食飯，就要睇管理層係咪會賣產體現股東價值啦。
陸羽仁
金融High Tea 舊文
來源 source: http://hdfin.stheadline.com