笑到最後：睇升睇跌一樣難
■如果北韓真係有沽期指，今次應該成功「眾籌」經費。 資料圖片
6月19日，本欄指「調整市預跌兩千點」，結果，大市走勢完全相反行，做咗一次「食屎專家」。
突如期來跌千點，陰謀論睇係北韓被中國斷水斷糧，生意淡薄，惟有賭博，先沽期指，然後再出口術。過去一年，恐襲、
戰爭危機，都唔係跌市理由，反而係入市良機，但係千算萬算，今次配合港股嚴重超買，終於連升7個月下，第8個月成功偷雞，一次過挾死大槓桿投機客，如果北韓真係有沽期指，今次應該成功「眾籌」經費，所以高明安慰身邊死傷慘烈的戰友，下次北韓核試或者試射導彈，記住收睇，因為你可能係「金主」之一。
今次調整，最先犧牲咗係衍生工具，然後相信到期貨，上星期認股證佔大市成交繼續超過兩成，炒風未有收斂，但上周四、五高位再跌最多673點，未必咁易追返前一個星期嘅損失。
但係以正股嚟計，其實損失並唔大，炒部份細價股，同個市冇乜影響。因為高明同同事喺臉書度做一個模擬倉實驗，有別於坊間一般模擬倉要贏錢，高明設定嘅「財漽會」，就係要漽滅財富，目標將100萬模擬資金炒到零。由於想會員真係靠眼光輸，所以只可以買正股，唔可以玩衍生工具，因為靠輸時間值輸錢係計數多於眼光。
經歷7個星期，證明真心睇升，同真心睇跌，撇除手續費，難度一樣。睇準一隻股票跌，即係有沽空機會，其實都唔易。部份會員五星期組合已升18%，幅度已經接近基金全年水平，但佢買嘅時候係諗住輸。大部份會員專吼二三線股買，但客觀事實係，二三線股今年冇參與升幅，以為開展跌浪嘅股票，模擬倉一買就大彈。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com