內銀唔差 下手唔易
2017年08月21日
上星期五港股受到隔夜杜指大跌274點拖累，裂口低開超過300點，喺27000點關口搵到支持，收市跌296點，報27047點，跌幅1.1%，國指跌1%，大市成交844億元。
港股跟美股跌，本身唔見得特別差。外圍暫時仍然係調整勢頭，港股如果
再跌，跌多500點至26500點左右，即是大約喺50天線水平，應該有較大支持。
恒指50天線有支持
上周五大市走勢仍然受騰訊(700) 左右，由於佢第二季業績理想，券商一致唱好，星展唯高達更將騰訊目標價由336元大幅提升至426元，成為全城最牛嘅券商。喺美國上市嘅阿里巴巴第二季業績亦好，呢兩隻中國科網股王雖然好貴，仍然受盈利急增支持。上星期五騰訊跟住大市向下，收報325.8元，跌1.1%，跌幅同大市同步。
跌幅大過大市嘅係內銀股，內銀股近日走勢偏軟，上星期五工行(1398) 收報5.48元，跌2.1%；建行(939) 收報6.51元，跌1.7%；中行(3988) 收報3.85元，跌1.8%；招行(3968) 收報25.75元，微跌0.2%，表現比較硬淨。估計內銀腳軟係因為即將公佈業績，獲利盤怕有人會趁好消息出貨，搶先回吐。
招行喺上星期五收市後公佈業績，一如所料地OK。招行之前出過業績快報，公佈嘅結果同快報預示一樣。招行上半年純利按年增長11.4%至392.6億元人民幣，每股盈利1.56元，維持唔派中期息。期內營業淨收入1130億元，按年跌0.3%。招行上半年淨利息收入709億元，按年增長5.1%，淨利差按年減少0.14%至2.3%；淨利息收益率減少0.15%至2.4%。非利息淨收入則達到421億元，按年下降8.2%。單就收入而言，招行純利升11%。
雖然招行淨利息收益率略減，但由於淨利息收入增加了5%以上，對招行盈利有貢獻。另一方面，不良貸款也降低，至6月底總額604億元，較去年底減少6.6億元，不良貸款率1.7%，比去年底減少0.16%；撥備覆蓋率增加44.7%至224.7%。一級資本充足率為12.4%，較年底增加0.88%；資本充足率14.6%，增加1.26%。整體而言，招行業績同預告一樣，經營有所改善。
有人話內銀業績係中國經濟縮影，呢個講法冇錯。內銀純利由接近零增長到今年有相當增長，證明中國經濟有啲向上動力，銀行壞帳狀況減少。招行係商業銀行，同國有四大銀行唔同，規模略細但作風比較進取；派息率冇四大行高，但營業競爭力比較強。以招行一隻派息3.2厘、市盈率9.4倍嘅銀行而言，如果有超過10%年盈利增長，其實有長線投資價值。
另外內地媒體聚焦喺招行嘅金融科技發展，今年上半年招行零售客戶人數接近一億，較去年年底增加6.9%。招行客戶人數上升，未受到互聯網時代普遍困擾銀行業難於擴展客戶嘅影響。
打造金融科技銀行
招行呢個「輕銀行」戰略轉型，頗為有效。招行將自己打造成「金融科技銀行」，大力推動移動互聯、雲計算、大數據、人工智能、區塊鏈等新科技，推動網絡數據化同智能化。招行手機銀行Apps累計下載4805萬，較上年底增加15.7%；活躍客戶人數2885萬，較去年增加10.8%，總體嚟講手機銀行增長良好。
招行過去一年低位17.52元，高位27.4元，現價25.75元，相當接近一年高位，就算盈利上升，依家真係有啲買唔落手。拉闊啲睇，過去三年招行喺2015年高位都係27個幾，依家再上高位，就好似兩個山峰，更加叫人唔敢買。
一班中環茶友講起買內銀股，有人話兩年前用7蚊買咗建行，呢位茶友不時收集建行股份，2015年6月「大時代」嘅時候，建行最高升上近8元水平，其後回落至7元左右，佢都入咗一啲，亦係最後買入嘅一批貨。到上星期五建行收6.51元，今年高位6.72元，仲未到茶友最貴一批貨嘅7元買入價，更遠未到兩年前近8元嘅高位，比招行已近2015年高位仲差啲。
建行遠未到大時代高位
茶友講述當年買建行心態，佢深知內銀股呢種龐然大物，建行有1.65萬億元市值，係四大國內銀行之一，市場上有壟斷地位，但盈利亦都好難有大增長。但建行派超過5厘息，錢放喺銀行存款就冇乜息。內銀股風險唔高，於是佢係睇派息先分批收集建行。雖然最後一批買嘅建行，到今年仲未返到家鄉，但茶友表示，揸住建行每年收五厘息，佢買股唔太喜歡出出入入，升上去都唔會賣，股價未返家鄉都冇所謂。
2007年以前，國有四大銀行陸續來港上市。當時可以話係香港股市嘅黃金期，呢啲國有銀行股規模大，市場都夠熱，當年買入呢啲股份嘅人都有斬獲。睇番今日股市回升至27000點，雖然仍未及2007年嘅高位32000點，但都唔算低，然而新股上市嘅狀況一啲都唔算熱，大市都唔係好熱炒，好多二、三線都沒有動靜，就算係藍籌股，都主要集中喺騰訊等幾隻股份。好似內銀股都未創出高位，甚至未返到兩年前嘅價位。
宏觀啲睇，2007年之前比較熱炒新興市場。高盛提出「金磚四國」概念，將中國、印度、巴西及俄羅斯股市炒高，賭佢哋經濟會快速增長，連礦石等商品都同時炒上。自2007年泡沫爆破、2008年金融海嘯之後，美國連番QE放水，將利息降到零，造成資金大量回流到美國呢啲大力放水嘅已發展市場。
時至今日，情況雖然有好轉，國際資金仍未全面對新興市場改觀，覺得包括中國在內嘅新興市場風險仲係比較大。以招行為例，由於係商業銀行，經營比較靈活。按道理應該較國有銀行更受投資者青睞，但由於整個內銀板塊都唔掂，吸引唔到太多國際投資者注意。以股論股，好多外國銀行股已經去到成十幾倍市盈率，招行盈利增長OK，市盈率喺十倍以下，其實有相當唔錯嘅投資價值。
唔怕悶先至好買內銀
再睇番招行業績，不良貸款正在下降中，總體風險可控。如果從一個價值投資者角度嚟講，招行都係唔差。講得誇張啲，如果中國經濟崩潰，就算係騰訊一樣會受影響，唔單止係內銀。現實上，中國經濟唔似會崩潰，意味內銀股估值其實偏低。
投資者正面對一個兩難題，內銀明顯係弱股，但已經升近兩年高位。貴買弱股，智者不為！換個角度，論基本因素，內銀股風險不高，招行派三厘息、建行更派五厘息，好似茶友一樣即使買貴咗，揸住收息，都唔係壞投資。所以買唔買內銀，屬見仁見智。想買強股，當然係買騰訊；喺價位較高時買弱股，就要承擔股價有可能回落嘅衝擊。
我個人睇好中國經濟長遠發展，認為內銀唔會散，只計收息，每年有3到5厘嘅回報都算係唔錯嘅。但內銀股價升幅有限，可以話「內銀唔差，下手唔易」，想博快速升值，就唔好買內銀，唔怕悶先好去買。
陸羽仁
金融High Tea 舊文
來源 source: http://hdfin.stheadline.com