特朗普佗衰市
2017年08月21日
美國總統特朗普呢排頻頻甩轆，最新又有親信請辭，令位高勢危嘅美股借勢調整，上周末美股連跌兩日，三大指數收市齊齊再跌，杜指周五收市報21674點，跌76點，納斯達克指數收市報6216點，跌5點，標普500指數收市報2425點，跌4點。
每盎司金
價重見1300美元
外圍唔精神，上周五港股都有壓力，恒指上周五一度跌穿兩萬七千點，收報27047點，國企指數報10693點。以全周計，恒指累積上升164點；國指累積上漲120點。港股呢一浪調整，最先係由特朗普打開口牌話要發火對北韓，觸動市場對地緣政治風險嘅關注，跟住就到佢嘅班底再爆人事變動，市傳國家經濟委員會主席科恩呈辭，市場愈睇愈唔似樣，擔心特朗普兌現唔到佢刺激經濟嘅承諾，受影響嘅唔止股市，紐約期金今年都首次升穿1,300美元關口，十二月合約最多漲咗0.9%至每安士1,303.9美元，現貨金價升至最高1,298.08美元，升0.78%。現貨白銀升1.67%至17.322美元。金價強，美元相對乏力，日圓升破109水平，高見108.6兌每美元，升0.89%，每百日圓報7.2022港元，係驚佢佗累下，短期大市似乎都籠罩係美元資產調整嘅大氣候下。
美匯先過美股見頂
特朗普去年爆冷勝出總統，當時被形容為黑天鵝事件，其後大家忽然覺得佢嘅大美國主義好掂，於是令美元美股興奮起嚟。我嘅睇法係金融市場有佢嘅規律，特朗普以經濟素人執政，相信好快就唔能夠逃離跛腳鴨嘅命運，所以對佢上場唔使太驚，亦唔使太興奮，而家佢上任幾個月，基本上就係走向跛腳鴨之路，美國總統呢個位，講到底都係全球最有權力嘅人，未跛之前佢嘅言論，都仲係對世界金融市場產生影響，美元係特朗普勝出後，先係今年1月美匯指數103．8見頂，之後反覆回落到上周嘅93.4。
美股相對就強勁好多，到咗呢個月仲係反覆探頂，主要係美股受美元轉弱推動跨國公司業績向好帶挈，不過呢個因素已經反映得八八九九，唔排除會借特朗普弱勢嚟次深啲嘅調整。至於港股借住騰訊大升一口氣攻破年中26063嘅高位，高見27855點，回調試番兩萬七點睇嚟在所難免。
鳳凰斬纜 港視傷腦筋
上個星期，鳳凰衛視(2008) 宣布撤回免費電視牌照嘅申請公佈，坦言係由於本地免費電視服務之不利巿況及公司業務及投資方向的改變。鳳凰衛視(02008) 附屬紐交所上市公司鳳凰新媒體，截至6月底止第二季度由虧轉盈，應佔淨利潤為2490萬元人民幣，上年同期虧損250萬元，睇嚟鳳凰可能覺得集中精神做新媒體業務，好過再花咁多彈藥係香港搞免費電視。本港電視難做已經變市場共識，投資者由炒做電視到而家聽到做電視就腳軟，鳳凰呢個決定唔令人意外，有線寬頻(1097) 除淨後再見新低都唔令人奇怪。有線跌到咁殘，原先嘅大股東九倉決定送清晒手頭嘅股份，一股不留，徹底斬纜，小股東都已經無眼睇，反而香港電視(1137) 係咪繼續搞電視就真係要諗諗。
香港電視而家做電視同網購兩邊燒錢，早前佢要求更改流動電視服務所用傳送制式嘅申請獲批，變相可以提供電視服務，股價一度走高，曾經炒過3元樓上，不過「好消息」後股價就無吐。公司最新公布上半年業績，虧損收窄至9620.4萬元；每股虧損11.9仙；不派中期息，去年同期則蝕1.26億元。雖然公司公布網購生意有好轉，但燒錢速度其實仲幾高，公司係業績中已經暗示對投牌做免費電視會轉軑，皆因而家電視惡做已經唔係新聞，坦言話考慮同8年前首次申請牌照時已經唔同咗。免費電視難做，做足幾十年嘅亞視已經有辦睇，根本唔需要等呢8年都知道。坦白講，無論公司是否堅持繼續兩邊燒錢，股東就不妨諗吓係咪趁呢排股價好番啲套吓現先，如果佢話去馬，咁就更加要趁佢有價，諗吓係咪要學九倉甩有線咁，賣到一股不留。
鄧永鏘識食腦 創中環飲茶勝地
早前外電有段消息，話「上海灘」創辦人鄧永鏘係英國約咗班老友相見，為自己開個人生最後嘅舞會。有人後來搵到佢查證，本身就答話唔想講，但好多人都覺得呢種好似鄧公子嘅風格。
鄧公子乃少數國際名人，同英國皇室尤其老友，佢係米字國嘅知名度，比起香港仲高。不過，係中環飲茶嘅茶友，就無人未去過佢搞嘅中國會。中國會嘅特色，其實就係唔係咁中國，而係似外國人眼中嘅中國，內裏全部充斥咗「扮嘢引老外味道」，由佢嘅話到擺住毛澤東像都係。好多茶友話，佢同中環好多名店一樣，食物味道麻麻，但就勝在「就腳」。當初舊中國銀行騰空，好多專業設計師都話呢幢大廈每層太細好難用，但佢夠膽用嚟搞會所，結果成功跑出。
中國會唔係咁中國
中國會唔中國嘅其中一個地方，乃係服務態度。老外一向注重服務，唔會任啲夥計亂嚟，但中環幾間富豪飯堂，過年問人攞利是個種兇狠法，就真係中國會學唔到，所以華人大老闆，始終唔係咁多人去。有人話，鄧公子雖然係名人之後，但家族剩俾佢嘅身家本來唔多，但因為佢識得食腦，明白中西合璧嘅消費市場係點，所以成世過得逍遙，真真正正係日日擔口大雪茄，唔使充都係做闊佬。
陸羽仁
陸羽仁周記 - 陸羽仁 舊文
來源 source: http://hdfin.stheadline.com