Money Walker：下半年關注兩件事
■侵侵透支市場憧憬多時後，開始撐唔住，故美股後市欠升市催化劑。 資料圖片
呢排本地與環球大新聞多多，芸芸消息中，筆者認為中長期最影響到投資市場嘅，不外乎係內地走資同侵侵動向呢兩樣。
十九大舉行前，中央限走資措施層出不窮，最
新係上周國務院要求內地企業於境外多個範圍投資，必須事先得到審批。雖則當局暫未出招限制個人來港買樓、投保，甚至乎shopping，但不排除限走資範圍未來會進一步擴大，而極度依賴內地資金或客戶嘅本港上市企業，好似本地地產、保險及零售等，分分鐘間接受累。
外圍方面，侵侵透支市場憧憬多時後開始撐唔住，加上美股業績期已屆尾聲，意味後市欠缺升市催化劑，外圍未來一段時間或會時不時來一輪避險。
筆者上周睇好黃金會受捧，可惜金價上周第三度上試1,300美元阻力後，仍未能突破，陰陽燭日線更已形成「三頂」呢項利淡訊號，預示短期向下機會大。不過睇番陰陽燭月線，金價依然處於三角形待變格局中，筆者推斷金價短期或要跌一跌，但中期仍有望向上突破。
題外話，特首早排講過經濟民生要與政治分開，但環顧中外，股市、經濟與政治三者明顯環環相扣，近排美國嘅情況已經係好例子。香港不公嘅選舉同議會制度，令民意長期無法進入議會，由此衍生嘅民間反對聲音又遭政府漠視甚至打壓，如此獨裁嘅香港，莫講話難以搞好民生，就連股市同經濟競爭力都隨時不保。
El.
Money Walker - El. 舊文
來源 source: http://hk.apple.nextmedia.com