操盤手札記 - 割柑人 2017年9月14日
操盤手劄記：華資重組睇太傅
■想炒恒地重組，要留意林高演幾時引退。 資料圖片
特首林鄭月娥拋出「首置上車盤」概念，上周五地產股隨即炒起，尤其擁有農地者。四大龍頭長實（1113）、恒地（012）、新地（016）、新世界（017）中，以恒地農地最多，亦最受捧。下月施政報告發表前，相信仍會再炒。
其實，地產股近期亦有分拆重組憧憬。九倉（004）繼將蝕錢生意有線寬頻（1097）甩手後，上月再宣佈分拆九倉置業，以介紹形式上市。九倉連環兩招，可以提升估值、收窄股價相對資產淨值（NAV）嘅折讓；更可能掀起新一輪華資企業嘅分拆重組潮。
華資大孖沙重組上市王國，此前已有李嘉誠家族喺2015年重組長和系；鄭裕彤家族嘅新世界亦喺舊年私有化新中，今年想再私有化新百貨（825），但衰咗。長和系、新世界系會唔會有後著？四大家族中，李兆基家族嘅恒地、郭得勝家族嘅新地又會唔會出手？
地產股估值通常係NAV discount。NAV discount多少包含management discount。地產股搞重組，目的當然係釋放價值，收窄折讓啦！今年6月底，長實、恒地、新地、新世界嘅每股NAV分別係74.34元、68.86元、164.68元、18.47元，現價分別折讓10%、23%、17%、39%。
華資生意王國，通常由家族下一代接班，太子未坐正時，會由太傅扶助。長和系嘅霍建寧、恒地系嘅林高演、新地系嘅黃奕鑑、新世界系嘅梁志堅都係殿堂級太傅。鑑叔、堅叔已退役，現役只剩霍建寧同林高演。長和系重組後嘅長實地產，早兩個月話將個名改回「長江實業」，成件事好吊詭，唔通鋪排霍大班引退，太子坐正乎？
至於恒地系幾時重組？要睇林高演幾時引退，太傅退下代表太子坐正嘛！恒地喺2002年、2005年兩度私有化恒發（097）失敗，喺2007年向恒發買入煤氣（003）、小輪（050）、美麗華（071）後已久無動作。想炒恒地重組，要贒實幾時有管理層變動！
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com