FinTech概念啱短炒
2017年09月14日
今個禮拜市場有兩大熱話，一係蘋果事隔十年，再推出新型號智能手機，能否再創輝煌；第二係正在路演嘅眾安保險，打正金融科技概念，會掀起幾大嘅認購熱潮。
蘋果新手機萬眾期待，終於喺日前揭盅，新機特徵同先前外傳差唔多。蘋果手機全部外判生產，
做嘅量又大，特色基本上好難守得住秘密，有啲出乎公眾意料嘅，反而係機款公佈後，要成11月先有機攞，點解佢要拖咁耐，係刻意製造懸疑，抑或未生產得切，一於開住空頭支票先？本來市場準備睇住開售反應嚟炒，依家變咗要再拖。
信利批股接貨即賺三成
蘋果新機最貴要成萬蚊一部，有中環茶友問，依家大陸手機性能同蘋果相差無幾，價錢只係佢兩、三成，佢咁嘅價究竟得唔得㗎？問呢個問題嘅茶友顯然唔係果粉，從果粉立場，貴一貴都係要買。
蘋果產品黏性強，係佢品牌最值錢嘅地方，外國分析員相信，由於消費者多數以月費計劃購買手機，訂價高應該都唔會影響需求。新手機銷情因為出貨問題未見真章，對手機設備股嚟講前景朦朧代表仲有得炒。
一眾手機設備股昨日繼續上升，低價批股嘅信利國際(732) 大漲12%，報收2.6元；舜宇光學(2382) 升4.4%收造124元；瑞聲科技(2018) 升1.3%收報141.3元。丘鈦科技(1478) 周二升逾9%，周三下挫近半成收報14.64元。
信利國際啱啱宣佈按每股2.02元向不少於六名承配人配售1.6億股新股，以及向主席兼董事總經理林偉華配售5333萬股，所得款項共約4.31億元，承接股價嘅主席同六名承配人一日就帳面賺接近三成。
市場另一熱話係做緊路演嘅眾安保險。眾安賣嘅係網絡投保平台，佢開初最主要幫淘寶買家做吓網購交貨嘅保險，屬消費層面嘅小額投保，過去一、兩年增加旅遊保險，單價大啲，但係傳統大額嘅醫療保險、壽險仲未點發掘。由於呢啲細額保險邊際利潤極微，眾保基本上仲未賺錢，佢過去幾年賺嘅錢，主要係手頭資金用嚟投資嘅收益。有睇過路演嘅人話，根據管理層嘅計劃，要真正賺到有睇頭嘅盈利，最快都要等2020年。
眾保依家路演，市場反應聽講唔錯，除咗因為主要股東有三馬—馬雲、馬化騰同馬明哲，仲因為佢係打正金融科技(FinTech)上市嘅大型股份，佢嘅賣點係會以科技推動保險銷售，提供各種想像空間，至於日後做唔做得到，就要睇管理層嘅執行力啦。有過騰訊嘅經驗，呢類概念股長遠點走無人敢講，短線炒炒就好多人有興趣。
眾安未有盈利仍獲熱捧
市場焦點去咗蘋果新機同眾安保險，雖然美股造好，恒指始終唔肯衝破28000點關口，高開12點後走勢向下，最多曾跌220點，低見27751，午後走勢略為回順，恒指收報27894，跌78點；國企指數收報11187，下滑54點，成交金額895億元。
指數無得升，汽車股就維持強勢，周三更逆市向好，比亞迪破頂，最曾高見58.45元，收市升6.6%報58.2元，比亞迪已連升六日，累漲24%；吉利(175) 同樣六連升，股價破頂，最高見21.15元，收升0.7%報20.85元，其他汽車股同樣向上，華晨中國(1114) 升4.9%收報22.5元；新晨動力(1148) 升3.63%收造1.14元。
陸羽仁
金融High Tea 舊文
來源 source: http://hdfin.stheadline.com