智取大市：教育生意放在賭枱上
■內地教育股再爆上，呢盤生意長遠是否真增長，等退潮先講吧。資料圖片
未睇得切教育股嘅招股書，就已經再爆上。牌面睇，內地教育股係一個容易理解嘅增長故事，開辦學校，然後收學費、住宿費賺錢。作為一個投資者，大家都讀過嚇書，呢盤生意就變得容易理解，就好似香港經營
國際學校咁有錢賺。現時股價幻想嘅故事係咪同將來現實一樣咁好景？反正資金已經當係真嘅增長故事去炒，短線市況夠癲之下，有乜嘢做唔出？呢種玩法，係投機者牛市至愛，這就是價值所在。
以民生教育（1569）為例，目前喺重慶同內蒙開設4間學院，半年純利增長7.7%，未來透過投資學校，然後增加收生人數，令收入持續增加，暫時增長率較新高教（2001）同睿見（6068）嘅兩至三成半年盈利增長為低，所以民生教育估值都相對低。
假設下半年盈利相比上半年增長一成，民生教育、新高教、楓葉教育（1317）、睿見、宇華（6169）嘅預測市盈率分別係20倍、22倍、24倍、33倍同36倍，小弟本來都覺得呢個估值狼狼哋，只不過未去到狼死咁解。
至於長線，假如教育行業係真增長，公司管理能力優劣都並非重點，因為當處於一個起飛行業之中，盤生意真係馬騮都識管。回想2007年，中鐵（390）、中鐵建（1186）、中交建（1800）一樣估值貴一貴，業績增長期交唔出功課，到咗行業逆轉時先知道基建三寶係乜嘢斤兩。正如畢菲特名句：「到退潮時才知道誰在裸泳。」至於教育股？係咪個個都裸泳，唔係而家講，都係等退潮先講吧。
晉佳
晉佳
智取大市 - 晉佳 舊文
來源 source: http://hk.apple.nextmedia.com