【大茶飯】個個都做電動車（青冰）
近期研究電動車，也特別留意相關的新聞，上個月睇報導話有車廠總理之稱的默克爾，露口風話德國將跟隨法國及英國，定出時間全面淘汰柴油車。上星期戴姆勒車廠(即係benz母公司)的CEO親口證實，在2022年就會將旗下所有車款電動化。雖然Tesla在美國及香港都紅咗
幾年，但在大西洋的另一邊，歐洲真係唔太熱衷電動車，尤其在德國。
青冰其實都唔明，德國咁多名牌車廠，點解咁多年來都唔為電動車做好準備，由得Tesla霸曬頭條，係嘅德國廠都有幾部電動車，但你甚少見人揸及談論，現在要急起直追喇，而Tesla的真正挑戰亦終於來臨。
青冰唔擔心德國車廠搞唔掂電動車，話曬車係佢地強項，有技術有錢，一定追得番，不過咁多德國廠忽然醒覺，有一樣野就必先要解決，就係鋰電池，而最重要的原材料，就係鈷。LME鈷今年累積升咗90%，比青冰早前推介的鋁仲勁，鋁就話係受惠中國供給側改革啫，乜鈷已經有咁大需求咩？
青冰google過之後，發現最近大半年，很多對沖基金經理都在累積好倉，而佢地更加覺得LME期鈷的交易量不夠，仲去囤積實體的鈷。你可能會覺得佢地係癡線，英法政府定下的2040年限期，仲有好耐吖，不過那個是硬死線，真正做生意的車廠，唔會最後幾年先搞，果然，德國廠開始做野喇。
香港的金融人，的確幸福，又可以咁容易買到Tesla，要投資鈷，又可以買洛鉬(3993)。洛鉬早前買入了剛果鈷礦業務的24%權益，雖則係少，但這個概念真係無敵，因為剛果係全球鈷礦的最大出產地，如果日後鈷價飛到上天，相信有唔少妖股將會改名，話會進軍剛果了。
洛鉬今年累升1.6倍，不過今年唔少資源股升幅都以倍計，比較之下洛鉬就幾有前景，供給側改革可以減少鋁、水泥、煤及鋼的供應，但始終要需求配合，先可以長升長有，而初步睇，鈷的確有前途，因為爆炸性的需求，可能已由德國佬啟動了。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com