中環在線：分享輸甩褲教訓
李博衛︰咪盲目All in
■李博衛自爆大學炒股損手，叫大家記得做功課。
港股今年已經連升8個月，就快去番師奶阿伯都識得醒你貼士買股票嘅時候，投資者教育中心總經理李博衛（David Kneebone）噚日不惜自爆大學時代炒燶股輸甩褲，都係想告誡市民投資前要
參考多啲意見，唔好盲目All in。
話說1980年代尾，David剛入讀新西蘭大學時，幾個同學夾錢一齊買股票，買之前會互相辯論好壞處，佢自己瞓曬身。原本買落嘅地產股、航空股、甚至零售股，隻隻都賺到笑，個市好就雞犬升天嘛。點知之後遇到冧市，佢先知道，股票原來可以突然跌八九成，呢個18歲少年方發現，投資組合幾乎全部都係股票，非常危險，佢亦一鋪清袋。今時今日講起呢次經驗，David當然可以笑笑口，但當時一定笑唔出。
咁啱，8月份投資者教育中心調查發現，近60%成年受訪者過去12個月有投資金融市場，三分之一承認曾經損手，投資咗唔適合自己嘅產品。同時，呢班投資者，90%話係倚賴親戚朋友意見，得9%會真正閱讀財務文件，都咪話唔得人驚。
David分享自己「血的教訓」，都係想市民投資前聽多啲、問多啲。而當年嗰班齊齊炒燶股票嘅同學，𠵱家仲係老友喎！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com