智取大市：金融股只捧一隻
■平保季績靚爆，加上內險近排吃香，要挾淡倉，就靠呢一轉。 資料圖片
小弟一向對中資金融股有保留，但係內險股，又唔係隻隻咁水。中國平安（2318）最新業績靚爆鏡，今年頭三季，經常性盈利增長幅度達到四成，壽險及健康險新業務價值增長35.5%，無論純利水平，抑或
以資產角度，賬目中提供嘅內含價值數字，平保都已經超越咗國壽（2628），當中係因為平保有埋銀行、財產險、互聯網金融等等業務，開多幾條戰線去擴充。
平保經歷金融海嘯之後，2009年開始每一年盈利都錄得增長，好景時增長特別快，有別於國壽盈利過於倚賴A股走勢。因此，縱使兩大龍頭近幾年壽險業務嘅新業務價值增長得快，當中能夠轉化成穩定盈利增長嘅，就只有平保，證明兩者經營能力有一度差距。平保股價對內含價值1.5倍唔夠，有排都未算得上貴。
另外，平保係港股之中累積沽空金額最多嘅股份，以截至10月20日計，達到914億元，相當於H股流通市值六分之一，最近一個月，平保嘅H股沽空佔成交比例大增至平均三成以上，同以前一兩成比較明顯上升，仲要上星期五去到47%。平保季績靚爆，加上內險近排吃香，要挾淡倉，就靠呢一轉。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com