眾安開車何太急
2017年10月06日
今個星期港股雖然只得三日市，但假前兩個交易日已經升左超過八百點，假前周三指數最高升過348點，一度逼近2015年大時代高位，全日升205點，距離2015年高點28588只差67點，之後美股杜指就輕微高收左19點。
「甘比效應」未消失
港
股上試高位，動力依然係幾個當炒板塊，生力軍係內銀股，佢地輪流繼續炒，青島銀行(3866) 假前周三單日升左3%報6.8元；工行(1398) 再升1.8%報6.37元。至於原先炒開嘅內房股繼續有追捧，喺「甘比效應」下，融創(1918) 升7%報40元，華置再增持嘅恒大(3333) 破關而上，升3.7%報30.75元，兩者雙雙創左新高，其他大股碧桂園(2007) 升7%報13.4元；中海外(688) 升2.3%報26.65元。
另一個炒開板塊汽車股都向好，比亞迪(1211) 升7.7%報78.9元；吉利(175) 升4.9%報25.9元，新晨動力(1148) 同華晨中國(1114) 合營公司華晨寶馬就訂立資產轉讓協議，向後者收購發動機裝配線、輔助設施同埋備件資產，以生產三汽缸1.2升排量發動機，代價大約係1.19億元人民幣，新晨動力股價急升23%收造1.35元，華晨中國升0.5%報收22.1元。
大時代前夕，市場嘅焦點要算係半新股眾安(6060) ，佢周三基本上由朝升到晚，單日急升20%報收80.35元。呢隻係熱門新股，中環茶友中有幾個都有玩吓，有茶友用真銀入票中左幾手，首掛即刻收割，執左2000銀夠飲茶食飯，佢坦言覺得眾安訂價高，經營模式唔夠扎實，一早決定趁熱鬧攞吓利是，決定一掛就食胡，跟住佢點升都唔關佢事，亦都唔會羨慕。
二手入貨好過認購
另一個茶友就馬後炮，話自己計完數冇申請，等佢掛牌第二日就喺63.5元入貨。佢嘅數口係咁，眾安未上已經大熱，尤其話軟銀嘅基金做左基礎投資者，預計就算大手入票都未必分得多，計埋利息成本未必有好多甜頭，但借重孖展點都有啲風險，不如等佢掛牌靜觀其變。
至於點解佢第二日喺63.5元入貨，佢就話係用大戶心態捉路，皆因今次公司三大股東喺內地有頭有面，嚟到上市唔想得罪街坊，於是一人一手，如果分一手100股，計埋手續費要200元，63.5元沽貨只係執得150元，再跌就無肉食，老散可能死坐，基金set呢個位入貨已經可以話係雞肋價，所以如果想買嚟炒就無謂再等。
喺二手市場買雖然貴過招股價，但唔使畀利息、唔使冒凍結大筆資金風險，仲可以要幾多買幾多，計落係咪除笨有精先？
茶友坦言，眾安收左兩日貨就開車，佢都有啲估唔到，所以都唔係買左咁多貨，依家諗番佢開車咁急，一來可能好多想沽貨嘅散戶，頭一、兩日已經沽左貨離場；二係好多人分貨分得唔多，部份人索性擺喺度任佢炒，令回吐嘅盤源減少，加上有啲基金覺得揸唔夠貨，所以就大力撩上。由於呢排個市旺，佢都會學似唔少人對於呢類科技概念股咁，抱著唔急沽嘅心態剝花生。
講起急升股，做大數據、融合通信、雲計算、網絡安全SDN、網絡金融等頂層設計嘅創業板股雲博產業(8050) ，因為附屬公司引入兩新股東，股價單日大幅上漲228%，報收1.97元，上日仲收緊0.6元，升勢極急。雖然公司最新業績仍然蝕緊錢，市值一日內已由唔夠9億暴升至26億元。呢啲股唔易炒，唔知貨源歸未，好難跟。
陸羽仁
金融High Tea 舊文
來源 source: http://hdfin.stheadline.com