魚樂無窮：3個不祥的訊號
■近日上市新股例升，差別只在於幅度。資料圖片
傳統智慧話畀我哋聽，全民皆股之時，股災就會隨之來臨，點樣量度散戶參與度，最直接方法係睇成交︰港股成交已連續8日破千億，炒風升溫乃不爭事實，除此之外，最近耳聞目睹3件事，在在反映股民進入hyper mode。
第
一，雷蛇（1337）上周五暗盤交易，經紀戰友報料，話出現死機情況，反映參與人數極多，事實上，近日上市新股例升，差別只在於幅度，咁易贏錢，必有妖孽。
第二，我用開嘅收費報價，本周一早上竟然死機，印象中係兩年來首次，直線思維出發，多人用自然會塞車，股市有幾旺可想而知。
第三，本欄周一搶先睇hit rates竟然超過三萬，強勢怒破個人紀錄，標題吸引固然係，更大機會係越來越多人睇股票專欄，原因大家心中有數吧。
「咁多跡象顯示全民皆股，係咪要清倉離場？」都係嗰句，暴跌之前的升浪永遠最快最勁，你有信心癲市下嘅利潤，足夠彌補喪跌嘅損失，當然係繼續玩落去，直至終極一爆為止，唔想咁刺激嘅，隨時可以走人。我自己嘛，面對咁多不祥訊號，最後決定沽出非核心持股，控制風險，同時將注碼集中在強勢股身上，戰至最後一刻！
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com