凱知樂插水之謎
2017年11月16日
港股升穿29000點，斷估冇理由就咁一騎絕塵向上衝，噚日借住美股回調，加埋觀望騰訊(700) 業績跌番吓。早兩日有網友講到新股中，Lego代理商凱知樂(2122) 首日上市已經潛水，噚日係佢上市第二日，股價繼續插水，成為股民陷阱。噚日早段反彈又遇跌市，結果無功而還，收市
跌1仙，跌0.8%，報1.31元。
信心滿滿撞正航空母艦
呢排新股大有大升、細有細升，好似凱知樂咁插法真係少有。牌面睇，Lego無上市，佢有Lego概念，加上內地依家有二孩熱概念炒吓，原先大家都覺得佢應該唔會太失禮，點知變成人升佢跌，斯人獨憔悴，網友大聲柴台。了解後，呢次似乎疑似係眼高手低造成嘅慘案。聽聞公司有意上市，高層中有人算係識吓資本市場運作，喺過程中招呼基金經理吹吓水，事後自覺反應幾好，於是搵左間相熟中資商人銀行嘅阿姐搞上市。呢間商人銀行作風曾經幾進取，後來受到關注，凱知樂搵佢幫手上市，護航工作就已經蝕左章啦。
唔知係咪初頭有信心得滯，公司招股日期仲擇錯日子，跟貼閱文(772) 同雷蛇(1337) 條隊，結果未出閘就窒步。最後喺新股熱潮中，超額認購只得11.3倍，公司按每股1.55元定價，接近招股價每股1.5元至2.2元下限。股份分配方面，一手2000股中籤率係5%，認購25手先穩獲一手，搞到咁低嘅一手中籤率，減低左少少散戶掟貨嘅機會，睇落係想安排好嘅希望可以圍飛炒上。不過，公司首掛後好快破底，由於佢都有啲大飛認購，見到近下限定價，借孖展嘅客戶一唔對路就斬倉止蝕，造成惡性循環。高層搞手過去做過另一間上市公司，股價炒爆左，呢次搞上市再變成一舖「代表作」。
睇番凱知樂呢個案例，會發覺股市同踢波一樣，變數好多，有時真係連局內人都捉唔準，主事人原先可能信心滿滿，根本冇諗過會撞正強手打對台。本來閱文上市掀起新股熱，佢順勢而上都好易炒起，無奈係佢訂日子變左跟車太貼，一隻舢舨仔畀兩隻航空母艦夾住，打起嘅浪花都已經擊沉佢。
股市講一命二運，局內人尚且如此，何況係老散局外人，新股遊戲好似易玩，不過都要計風險，好似閱文爆升，有人話借孖展抽就賺到盡，不過，新股熱起上嚟中得少分得唔多，冷嘅萬一中到成手係，佢唔生性潛水，咁就賺十舖都唔夠一舖輸，呢個就係投機嘅風險。凱知樂頭幾日插得咁勁，相信最狠嘅斬倉潮暫時過去，若然依家仲未離場，就不妨睇多陣博佢收左貨反彈。
識得賺唔一定要食大茶飯
大市噚日調整，理由之一係等騰訊(700) 業績，收市恒指跌穿29000關，報28851，急挫300點；國企指數收報11412，跌188點，成交1151億元。騰訊跌1.3%，收報383元，早前大炒嘅中芯(981) 跌14%，收報11.7元，暴升股自然有機會暴跌也。
收市後開出嚟騰訊第三季盈利180.06億元人民幣，按年上升69%，業績叫做勝預期。有樣得意嘅係，佢披露帳目中上市投資公司權益的公允值合共1711億元，呢啲投資若然分拆，可以發水幾多呢？
同騰訊有關嘅中國最大嘅網上汽車交易平台易鑫集團(2858) 今日掛牌，喺上市前夕，暗盤價初段上升。噚日暗盤開報10.5元，新報10.9元，較招股價7.7元，升42%。呢排幾隻股首掛，其中以新加坡從事道路工程服務同建築機械租賃服務的承建商嘅雙運控股(1706) 最醒，收報0.84元，較發售價0.56元上升50%，唔計手續費每手5000股賺成1400元，相當唔錯，學小環姐話齋，識得賺唔一定要食大茶飯，一個幾毫有時都幾好賺。
陸羽仁
金融High Tea 舊文
來源 source: http://hdfin.stheadline.com