異動空間：萬眾同心煲騰訊
■市場一個騰訊壞消息都沒有，但經驗告訴魏力，氣氛如此一面倒，調整浪隨時就在眼前。資料圖片
「成個市好似齋炒騰訊（700）一隻股票咁喎！」相信呢個都係上周五（17日）你同我的反應。騰訊正股成交138.5億銀，相關輪證92.6億，對比番大市成交1,195.5億
，即係每5蚊就有1蚊炒緊騰訊。大行為了搶眼球，目標價越攀越高，大摩睇完526蚊，花旗就來個606蚊，全城唱好，一個騰訊壞消息都沒有，經驗卻告訴魏力，氣氛如此一面倒，調整浪隨時就在眼前。
值得留意，下月初恒指換馬，騰訊比重將由11.58%降至10%，有堆指數基金的沽盤等住掟，雖然供應期有限，但近日消耗完大量購買力之後，要再食埋呢堆換馬盤並不容易，特別是賭輪證的戰友，宜相當留神。
上日恒指再創十年新高，但逾千股向下，如果揸重內房、基建、資源等舊經濟股，現在應該已嗌緊救命。一河之隔的深成指、創業板更冧逾2%，「白馬股」風向標貴州茅台高台跳水，均非吉兆。仍未感覺到個市陰風陣陣？不妨望望自己倉位數值，是否仍在創新高？抑或早於一兩個月前已見頂回落？恐怕是後者居多。應市策略方面，為今之計只能縮窄戰線，汰弱留強等轉勢訊號，如閣下手揸一堆唔上唔落的二三線股，都係清咗佢先吧！
魏力
http://fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.finance.appledaily.com