魚樂無窮：全民皆股新解讀
■友邦係呢一浪其中一隻強勢股，繼續揸實，let the profit run！ 資料圖片
港股重見三萬點，乃十年來首次，但感覺上同呢個關口失散咗幾十年咁。冇計，過去十年我哋經歷咗金融海嘯、幾個QE、大時代、暴力救市、熔斷機制、收水、縮表，再由減息到加息，加
上無數咁多個牛皮日子，開心時刻係過得特別快，但傷心moment就度日如年。
升到高位係咪要食糊？我通常會從散戶有幾活躍去搵答案︰昨日主板成交高達1,574億元，靚創十年新高，同一時間，近日在不同場合，都耳聞目睹有人談論股票，完全符合全民皆股基本條件。
以前，呢啲情況往往係見頂先兆，我就算唔清貨都會大幅減磅，不過，今次情況有啲唔同──從不少渠道得知，雖然散戶們入市比例上升，但贏錢比率少得驚人，無他，因為大部份揸緊弱勢股博反彈，結果越揸越殘。唔信？你試下問身邊朋友，有幾多人有揸騰訊（700）、平保（2318）同埋友邦（1299）吖。
還記得本欄講過畸形市要畸形炒嗎？當大部份散戶仍然唔相信呢個玩法，證明個市仲有得去；反之，如果個個都識沽弱股買強股，肯肯定就係爆煲之時。
呢日幾時出現？我都唔知，不過呢一刻，我會繼續揸實強股，let the profit run！
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com