笑到最後：教你如何玩牛證
■玩牛熊證，就係當去馬會買一注win，輸曬就算，絕不再加注。 資料圖片
調整市終於來臨，跌得比想像中急，高明傾向相信係龐大震倉多於牛市結束。高明10月底買嘅恒指牛，一路換上去高𥧌期曾賺4倍，亦都喺今次回調之中壯烈犧牲。幸好主要持倉騰訊（700）及平保（2318
）正股則喺調整之中發揮功效。
本欄強調，騰訊及平保唔應該買衍生工具，因為升浪長以及波幅大，與其食一段升勢，不如長坐等到站，經歷今次大規模殺倉，買正股理應仲有水位，買衍生工具可能已損失一大截甚至全輸。
話雖如此，冇賭性點會炒股票？有賭性自然會玩輪證，不過，正如股榮兄話齋，「牛熊證存在目的，就是被打靶」。要有效宣洩賭性，同時令荷包有著落，輪證注碼必定要嚴格限制，較理想方法係拎正股回報去賭。處理方法簡單，有咁貼價買咁貼價，就係當去馬會買一注win，輸曬就算，絕不再加注。千祈唔好自己呃自己，以為遠價牛「安全」，今次騰訊波幅證明最終命運一樣係被打靶。牛熊證主要賭眼光及少少運氣，所以寧願買最貼價，一打靶，即時停止牛證交易，到下次正股賺錢後，再撥資金炒輪證，永遠不能犯本。
最後高明想講講蘋果財經版最新推出的網上節目「股票傳心師」。節目開始在網上世界有noise，主要原因是在蝕錢，最新官方數字顯示蝕10.6%。任何投機一開始先蝕一成其實冇咩大不了，網上噪音炒熱話題更加係好事，不過最終吸引觀眾，都係要靠回報。
四位主持Cal、唐牛、渾水、盧卡股，高明私下相識，佢哋炒股有一定水準。問題在於一個倉一齊炒，睇法唔同難免相撞，不如將資金分成兩份，組隊各自追求回報，以各主持功力一定有能力炒出正回報。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com