笑到最後：點解唔直接買騰訊？
■舊年開始，市場有一種奇怪思潮，就係搵其他爆升股同騰訊升幅比較，但係永遠唔買騰訊。 資料圖片
騰訊（700）調整兩日後再破頂，一隻股本身有增長憧憬，再加分拆概念，最重要係，市場不斷buy呢個意念，有咩嘢好得過一路升、一路等分拆？
當然，買唔買都係各自嘅投
資選擇。舊年開始，高明發現一種奇怪嘅思潮，就係臉書、炒股留言板，甚至財經專欄，開始瀰漫一種思潮：一、搵其他爆升股；二、然後同騰訊升幅比較，但係又永遠唔買騰訊。高明認為呢種思潮對爭取表現有害。
有啲資產，並非人人買到，最簡單例子就係樓，因為入場門檻高，投資其他資產以追回本港樓市升幅，其實都可以理解，但不應鼓勵，因為投資首要爭取絕對回報，其他資產升跌幾多，關你鬼事？
重申一次，本欄認為港股將會複製樓市升幅，當騰訊係太古城咁買，而買股票門檻較低，每手騰訊值4.42萬元，香港工資中位數約萬六蚊，高明夠膽話，撇除外傭，大部份打工仔一定買得起騰訊。如果只計買股票嘅人口，收入肯定更高，買騰訊根本唔成問題。
如果落場一刻，心入面嘅目標已經係要追騰訊表現，何苦要扮勁買其他股票去追表現呢？直接買騰訊咪得囉！
過去十年騰訊長升，未有太多人用嚟做指標，直至2017年近乎一隻股撐起恒指，吸引部份人去買，但另一部份人就經常要追追追追。追嚟追去嘅害處係：跑贏表現當然本事；追唔到，時間一過，又覺蝕底咗，然後冒更大險去追，十之八九贏完又輸返，白忙一年又後悔點解唔買騰訊，陷入惡性循環。
本身另有心水，而唔係為咗追乜追物，當然無問題。但懷住追嚟追去嘅目的博其他股，不如直接買你想追嘅目標算把啦。講真，過去十年好多香港人追樓已追到氣咳，冇必要搵多條跑道令自己辛苦。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com