智取大市 - 晉佳 2018年1月17日
智取大市：投機入市注意位
■日經平均指數舊年10月16連升後斷纜，同樣跌一日就再升過，港股走勢暫時極相近。資料圖片
大市調整一日就完咗，由藍籌領軍又再炒過。小弟噚日朝早喺fb亦即時通報，由於恒指升穿周一調整幅度嘅0.618倍，證明大家當中央打配資呢類消息冇到，於是投機性買入幾隻強勢大藍籌。
點解唔買二三線股？原因唔係隻隻都跟升，而且同一個板塊裏面都可能有個別股份好強，又有股無厘頭地弱，假突破亦頻頻出現，捉得唔準，好容易miss咗呢個短線浪。面對大升市，玩法上要選擇一種自己能輕鬆駕馭嘅方法，確保自己食得應棍。況且藍籌股升勢加速，波幅亦及得上二三線股，當然捨難取易更好。
大家不妨睇返舊年10月日經平均指數16連升後走勢，極具參考價值，當時日股16連升後斷纜，同樣跌一日就再升過，港股走勢暫時極相近。至於日經平均指數其後表現係點？喺其後8個交易日內，指數由22,000點升到23,300點左右正式短線見頂，見頂日即市衝高再急調整，高低位波幅逾800點，如果情況套喺恒指之上，見頂日唔排除有過千點波幅，例如衝高幾百點再倒跌幾百點。如果怕稍後面對呢種驚人波幅，做法就係逢高減持，同埋買入流通量較大嘅藍籌股。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com