中環在線：康宏吳榮輝幫過肖建華做大刁
■康宏總裁吳榮輝（左）同主席陳志宏都係屬於台灣幫。資料圖片
康宏股權爭奪戰，你告我，我告你，唔知幾時有結局。翻查資料，代表台灣幫富邦蔡家利益嘅康宏總裁吳榮輝，原來相當巴閉，曾被傳媒形容為「蔡家策士」，2009年轟動股壇嘅台灣南山人壽收購案，就係
由吳榮輝創立嘅私募基金博智牽頭，後來被指交易嘅幕後金主係肖建華，台灣監管機構反對收購而告吹。
50歲嘅吳榮輝曾任所羅門美邦亞太區董事總經理，1999年為富邦集團引入花旗集團做投資者，隨後過檔富邦金，2002年、2003年先後為富邦金收購台北銀行同香港港基銀行；之後佢就離開創立博智。
市場認識博智，要數番去2009年收購台灣南山人壽一役，當年博智搵埋上市公司中策，以168億元收購南山人壽，本地一班大孖沙鄭裕彤、劉鑾雄、金利豐老闆娘朱李月華買入一批中策可換股債券以示支持，前高官馬時亨與前銀行大班柯清輝又加盟中策，分別擔任主席同副主席，風頭一時無兩。
但後來有台灣傳媒爆料，指呢宗交易嘅背後金主係內地明天系掌門人肖建華（舊年1月喺香港四季酒店被挾回內地嗰位），台灣監管機構反對收購而告吹。《壹週刊》4年前訪問肖建華，都話認識吳榮輝。富邦蔡家2015年入股康宏後，吳榮輝就加入康宏做董事，睇番年報，佢2016年度年薪1,080萬元，最高係佢。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com