財經評論：夾錢神App點突圍
■食飯夾錢神物
PayMe最近想加入社交功能，其實不如努力搶市佔、推多啲優惠仲實際。互聯網圖片
成日話香港電子支付比唔上內地，早前陳家強接受本報專訪時就講咗句「我張八達通仲方便！」就被網民鬧爆離地、阻礙發展雲雲，不過有時候，又唔係一味推新嘢就係好。
話說食飯夾錢神物PayMe最近想加入社交功能，「讚好」及「評論」等新搞作，真係令人滿腦子黑人問號，不得不問返句「點解要咁做呢」？
相信身邊唔少朋友食飯買嘢夾錢都會用PayMe，的確係好方便。不過，總會聽到有朋友呻「一到lunch time就load唔到！」特別係中環友，你話幾激氣，日日食飯夾錢都要用，陣間拖嚇拖嚇又唔記得找數。
無耐之前，PayMe就因為部份人用嚟賺積分，而非真心用嚟做P2P轉賬，一下子將每月limit由1萬元減至5,000元。照道理，唔係餐餐出街食又或者大魚大肉，係應該夠使。不過，5,000元的上限，聽落去好似小家咗啲囉。
有用開嘅朋友覺得係德政，冇用開嘅朋友感受唔到佢嘅犀利。時至今日，筆者統計身邊朋友，仍有近半係未認識PayMe。
唔講PayMe，講嚇WhatsApp呢，唔知大家又知唔知WhatsApp早排推出咗類似Instagram嘅「Live Stories」限時動態功能，睇一睇身邊朋友，長期得一位玩緊WhatsApp限時動態，證明功能重疊，好難闖出血路。與其好似WhatsApp咁推出新function都冇人用、冇人知，不如PayMe努力搶市佔、推多啲優惠仲實際！
記者：陳家恩
財經評論 舊文
來源 source: http://hk.finance.appledaily.com