【實力取勝】挑戰高位只係起步（陳承龍）（第160期）
2018-1-19 14:07:52
執筆呢一刻，恒指全日收市升565點，即市時段直播室以致我哋辦公室入面，所有炒友都情緒高漲，因為越嚟越接近歷史高位三萬二。
文章見街時，相信大市已經升穿咗07年嘅高位，事實上大市1月一條氣
已經升到31904點，只係有一日咁啱同曼城一齊破不敗身，但強勢球隊調整過後會繼續贏，同一道理，強勢市況、強勢股亦只有繼續升。
小弟想提醒大家，今時今日升五六百點，其實都只係升1.8%，幅度係好有限，因為升至三萬一水平，基數大咗，幅度相對同兩萬二時比，500點唔算係乜，甚至未來升跌500點會係新常態，所以，大家千祈唔好以為升500點就等於升得太快，走去亂咁開熊造淡，大牛市梗係順勢睇好啦。
至於強勢股冇可能逆轉，小弟逐隻數就知三萬二只係起步。
滙控（00005.HK）：一句加息周期持續推進已解釋咗滙控強勢，肯定會受惠息差，市況好其他非利息收入都有排受惠。
港交所（00388.HK）：策略王網站報過小米今年想上市，仲有螞蟻金服、沙特阿美……嚟香港上市，仲有騰訊音樂、陸金所分拆，特別係中資公司，嚟香港上市特別多著數，我都未講每日成交添呀。
內銀：一帶一路，講完。
平保（02318.HK）：陸金所上市，肯定要托住平保股價，你係基金都唔敢沽啦！
騰訊（00700.HK）：騰訊音樂今年肯定上市，同平保一樣，騰訊有更多業務可以分拆上市，點沽呀！仲有遊戲業務，《王者榮耀》之後，騰訊推4款「吃雞」手遊《荒島特訓》、《光榮使命》、《絕地求生：全軍出擊》和《絕地求生：刺激戰場》，以騰訊覆蓋同發行能力，根本一推就等收錢，點會有得輸？而其實騰訊股價即使上多次600蚊，今日上升幅度都係有限，但對恒指推動就好有力。
最後，我覺得市面上有啲仆街堅無知，條仆街話我哋引人去認購啲新股害人，好似當日隻8285咁，但有認購的，當天全部贏錢，8285當日早AO沽賺幾成，淨係當日早AO有成3000個一手檔沽，全win，8285上市當日冇破過發。條仆街講到我好似引人入局點九你咁。唉！
實力取勝 - 陳承龍 舊文
來源 source: http://www.winmoney.hk