異動空間：中移動今次破燈？
■中移動大成交踢穿78蚊至80蚊千層蟹貨區，氣勢之強十分罕見。資料圖片
中國經濟增速回升至6.9%，內銀股估值持續修復，建行（939）、工行（1398）市賬率回升至約1.2倍，帶動恒指突破32000大關，國指亦重上13000關；年初13個交易日，國指累飆11
.8%，放甩恒指的7.4%，但值得留意，國指拋離10天線已近半成，9 RSI更已狂衝至93，為2015年大時代以來新高，反映市況相當超買，短線回吐風險漸增，特別是內銀股，短線不宜再追了。
雖然指數狂升，但其實操作一點也不易，皆因與以往大牛市不同，今次市寬表現麻麻，股份升跌經常一半半，板塊輪動極快，例如之前係威係勢的藥股，近日就真係變弱股，高位無走，資金又被綁住了。唔想高追的話，只好搵啲剛起動的指數股去衝，例如基建股及中資電訊股。
先講基建股，圖表最靚仔係中交建（1800），日線圖出現杯柄突破，兼升穿半年下降軌，成交放量急增，9 RSI處於69的合理水平，有條件衝多浸，上方阻力約在10.2元。電訊股方面，連中移動（941）都開車了，大成交踢穿78蚊至80蚊千層蟹貨區，氣勢之強十分罕見，究竟是預示指數見頂回落？抑或今次能成功破燈？鑑於估值修復行情持續，魏力傾向相信是後者。
筆者為證監會持牌人，未持有上述股份權益。
魏力
http://fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.finance.appledaily.com