死坐策略
2018年01月19日
呢排股市旺，新股排隊上市，做咗上市公司嘅龍皇集團(8493) 行政總裁的名厨幟哥在公司成功上市當晚，搞慶祝晚宴，請食200幾隻鮑魚，好多證券分析員都係座上客，席間有人話又到股市創新高，用魚翅潄口、鮑魚刷牙的日子來了。
北水湧港 以靜制動
講
起股市旺擦鮑魚，有做咗上市公司主席好多年的中環茶友睇法唔同，佢話早兩日喺九龍站名店食肆，見到唔係咁旺喎，距離魚翅潄口日子仲好遠喎。出現咁嘅現象，佢相信呢輪賺到錢的香港人其實唔係咁多，好多股都係北水炒起，所以只係內地客賺得多。
主席茶友公司一早上市，佢仲沽貨套現買咗好多物業收租，佢笑笑口話要發達梗係炒股啦，自己沽股買樓都係想收租，諗法本來係保守，但勢估唔到亦有北水係咁買樓，變成樓升值仲快。不過，呢排佢都開始回購吓公司股票，理由有兩個︰一係自己隻股同樓市比超低水；二係依家股市升，全部升的都是北水買的股票，自己唔敢追，咁不如守株待兔，買番啲自己公司股票，希望遲早炒到自己隻股。
主席茶友話，依家北水南下買股，佢吸取樓市升唔停的經驗，唔會咁快沽走啲股票。睇番樓市最初香港人猛話貴，當年前特首曾蔭權話市民如果覺得灣仔樓價貴，不妨買屯門樓，俾人鬧佢涼薄，事實係聽佢講依家都掂咗。結果係內地人買吓買吓愈買愈高，有唔少人就咁錯過咗上車機會，結果連本地有錢人都俾內地錢挾番轉頭要買貴樓追貨。
佢話o依家北水南下買股，香港人可能又話港股貴，但內地人習慣咗高增長市場，風險胃納根本高好多，所以佢都唔敢講港股依家貴定平，總之策略就係一味死坐，就算唔加注都唔會離場住，呢招好聽咁叫做以靜制動，直接講就係死坐當守業。
主席茶友之言，相信都反映咗市場部份情況，香港投資者其實手頭仲有好多銀彈，只係佢哋炒作買嘢無內地人咁勇，呢啲就係新發財同old money的分別啦。
呢排北水活躍，中港股市齊跳探戈，上證指數收報3474點，升30點創兩年新高；深證成指收報11319點，升15點。A股昨日見到金融板塊發威，中國平安(601318)創歷史新高站上80元人民幣，1.4萬億市值穩坐世界保險龍頭，帶動香港平保(2318) 再創新高，收升2.7%，收報92.5元。
內地銀行A股再度暴升，張家港行(002839)接連漲停板，農行A股價盤中創新高，工商銀行A股(601398)股價創十年新高，帶動本地內銀股急上，建行(939) 升2.8%，工行(1398) 升3.2%。
港股喺樂觀氣氛下，一度急漲250點，見歷史高位32233，收報32121，升138點；國企指數收報13094，上升226點，成交急增至1963億元。港交所(388) 創兩年半高位，曾見301元，收市升幅收窄，報297.6元，漲0.7%；最矚目係神仙新股希瑪眼科(3308) 急升逾1倍高見19.9元，收市仍急升58%，報15.4元，帶動唔少醫療股炒作一番，但同股不同命，炒作呢啲無乜背景的醫療股，就要小心撻落嚟要入廠。
內險派成績表變沖喜
內險股發力，皆因日前中國太保發佈去年保費收入公告後，A股四大上市保險公司2017年保費收入全部出爐，較2016年增長接近20.8%。當中龍頭平保全年保費合計收入6046億人民幣，按年增長28.87%。券商申萬宏源認為，平保長期保障型產品佔比進一步提高，預計2018年平安壽險NBV增速可維持20%以上；產險方面，預計未來平保等產險龍頭的市場份額有望提升。
新華保險去年原保費收入1092.94億元，按年下降2.9%。華泰證券認為，新華保險於2017年底完成公司轉型並於2018年進入發展期，轉型後新業務價值率在四大上市險企中處於高位，價值轉型成效顯著。國壽去年原保費為5123億元，按年增長18.97%。中國太保去年原保費收入為2790.82億元，按年增長19.5%。由於公佈數字唔錯，券商普遍對今年前景樂觀，帶動咗佢哋股價湧上。
陸羽仁
金融High Tea 舊文
來源 source: http://hdfin.stheadline.com