中環在線 - 李華華 2018年1月23日
中環在線：
香樹輝借錢畀囝囝買樓要簽借據
■香睿剛話留學日本時食便當都要計住計住。
大家成日話買樓要「靠父幹」，原來資深傳媒人香樹輝都走唔甩，佢阿仔香睿剛2014年以900萬元買入沙田駿景園一個單位，香樹輝幫手畀咗三成首期。有趣嘅係，香睿剛話，佢阿爸同佢上律師樓簽曬借據，父子都要有借有還。
入馬場唔去阿仔新書分享會
香睿剛35歲，早已成家立室，有一仔一女。佢中五畢業後去咗美國讀書，因為熱愛日本動漫文化，所以喺美國讀埋日文，之後考到獎學金去日本留學3年半，最近佢出咗一本叫《笑看東瀛》嘅書，講佢對日本社會文化嘅睇法，日前佢出席新書分享會，家人都有到場支持，不過就唔見香樹輝，香睿剛笑住話周日阿爸要入馬場，贏錢最緊要吖嘛。
香睿剛直率健談，問佢點解唔選擇喺日本生活，佢話喺日本生活，有錢就好，佢留學日本3年半，最後半年因為使曬獎學金，就知痛苦，簡單食個便當都要計住計住；加上日本經濟停頓，薪金唔及香港，所以佢選擇返港工作，曾喺信興打工，現職自由散工撰稿人。
香港八、九十後普遍面對置業難嘅問題，多數要靠父幹先畀到首期，香睿剛坦言，佢2014年買樓，自己儲到一成首期，再問阿爸畀三成首期，父子之間都要有借有還，簽曬借據咁話。不過，睇佢喺日本最後半年無錢使，阿爸都冇隨便接濟佢，就知佢阿爸有心鍛煉佢喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com