Can Bank：
HKTVmall實體店同順豐有乜唔同？
■HKTVmall實體店相對順豐取貨點，地點較為核心，租金應該平極有限，如要止蝕，定位要清晰啲。 互聯網圖片
臨近過年，新界個別地區拖篋人士又再媲美機場，筆者住新界，過去幾年，每一年臨近過年前幾個禮拜嘅周末假期，幾乎
每年都被呢啲篋碌過，咁當然碌過咁多次，散子亦由最初只著拖鞋出街，至今日唔著返對籃球鞋都唔敢出門口。
其實早期呢類訪客對新界居民影響，唔只係被篋碌腳咁簡單，起碼散子就試過要喺中環買洗頭水返屋企；身邊新界區嘅朋友亦都有咁嘅經驗，近年藥房供貨相對有準備，散子亦不至於無洗頭水洗頭。另一方面，近年網購盛行，網購不再單是淘寶，更有HKTVmall，起碼在日常用品上有咗保障。
唔少人都知HKTVmall去年開始有開實體店，早前出街都有經過，但就真係吸引唔到散子入去行嚇。實體店有少少似順豐取貨點，拎貨嘅地方，唔係去拎貨嘅都無謂入去，直到過去嘅周末，散子終於親身試過去拎嘢，一如所料，就係拎貨嘅地方。
其他有咩唔同？極其量就係有姨姨喺門口切士多啤梨試食，可能臨近過年，店內都有放朱古力等賀年禮品，但就係吸引唔到散子留步望多兩眼。事實上，如果實體店係協助舒緩物流緊張嘅，係值得嘅，起碼順豐都有辦你睇。但相對於順豐，HKTVmall嘅實體店地點上相對核心，人流相對多，雖然面積較細，但呢類舖租金平極都有限，成本未必真係低，王維基要止蝕，呢啲實體店嘅定位要清晰啲。
散子
Can Bank - 散子 舊文
來源 source: http://hk.finance.appledaily.com